Serikali yapiga marufuku shule kuwadai cheti wanafunzi wanaoandikishwa darasa la kwanza

Imewekwa tar.: May 3rd, 2021

Na Mathew Kwembe, Dodoma

Serikali imezipiga marufuku shule za msingi nchini kuacha kudai cheti cha kumaliza elimu ya awali kama kigezo cha kuwaandikisha wanafunzi wanaotaka kuingia darasa la kwanza katika shule zao.

Agizo hilo limetolewa leo bungeni jijini Dodoma na Waziri wa Nchi Ofisi ya Rais Tawala za Mikoa na Serikali za Mitaa Mhe.Ummy Mwalimu wakati akijibu swali la nyongeza la Mbunge wa Viti Maalum kutoka mkoa wa Dar es salaam Mhe.Mariam Kisangi ambaye alitaka kujua serikali inatoa kauli gani kuhusu shule zinazotoa sharti la kuwa na cheti ili mwanafunzi aandikishwee darasa la kwanza.

Mhe.Waziri wa Nchi ameona atumie fursa hiyo kutoa tamko hilo la kisera kwani Tanzania kama taifa haijafanya vizuri katika kuongeza idadi ya wanafunzi wanaojiandikisha kujiunga na elimu ya awali.

“Kwa hiyo haileti mantiki kusema kila mtoto anayetakiwa kuanza darasa la kwanza sharti awe na cheti cha elimu ya awali,” amesema Mhe.Ummy Mwalimu na kuongeza:

“Tunawaahidi waheshimiwa wabunge tunaenda kuweka nguvu katika kuboresha mazingira ya shule wanazosoma watoto wa masikini hususani shule za vijijini,” amesisitiza.

Mapema Naibu Waziri Ofisi ya Rais TAMISEMI anayeshughulikia elimu Mhe. David Silinde alisema serikali haijaweka utaratibu unaomlazimisha mwanafunzi anayeandikishwa darasa la kwanza kuwa na cheti cha elimu ya awali huku akisisitiza kuwa utaratibu huo umekuwa ukijitokeza kwa baadhi ya shule binafsi lakini siyo kwa shule za umma.