Serikali Yaagiza Wakurugenzi 31 Kutenga fedha za Lishe

Imewekwa tar.: March 19th, 2019

Serikali imetoa siku 14 kwa Wakurugenzi wa Halmashauri 31 ambao hawakutoa fedha kwa ajili ya usimamizi wa masuala ya lishe katika Mamlaka za Serikali za Mitaa watoe taarifa na kuiwasilisha kwa Wakuu wao wa Mikoa ambao pia watatakiwa kuiwasilisha Ofisi ya Rais TAMISEMI ndani ya siku 21.

Agizo hilo limetolewa na Waziri wa Nchi Ofisi ya Rais TAMISEMI Mhe. Selemani Jafo wakati akifungua mkutano wa pili wa tathmini ya utekelezaji wa mkataba wa lishe nchini uliosainiwa baina ya Waziri wa Nchi Ofisi ya Rais TAMISEMI na Wakuu wa mikoa ya Tanzania Bara Desemba, 2017 ambao ulianza kutekelezwa mwaka 2018.

“nazipa siku 14 halmashauri 31 ambazo zimeshindwa kutoa fedha za usimamizi wa masuala ya lishe kutoa maelezo kwanini hawakufanya hivyo, pia taarifa hiyo iwasilishwe kwangu na Waheshimiwa Wakuu wa Mikoa ndani ya siku 21, hii inasababisha shughuli za lishe zisiende vizuri nchini“

Mhe. Jafo amesema utekelezaji wa mikataba ya lishe uwe ni suala endelevu na sio tu kama sehemu ya utekelezaji wa shughuli za kila siku kwani nchi haitafikia malengo yake ya kuwa Taifa shindani.

Aidha, ameagiza Wakurugenzi kuwafuatilia Wakuu wa Idara ambao wanawatuma Maafisa kuwawakilisha katika vikao vikubwa wakati hawana maamuzi yoyote ili kuboresha utendaji kwa kupitisha maamuz kwa wakati.

Pia amemwagiza Katibu Mkuu Ofisi ya Rais TAMISEMI Mhandisi Joseph Nyamhanga kuwaandikia Makatibu Tawala wa Mikoa kutekeleza agizo lake la vyakula vyote vinavyopelekwa na wazabuni  katika shule na Wazabuni viwe na virutubisho ili kuboresha lishe za wanafunzi.

Amependekeza mwezi wa Agosti kuwa na tarehe ya kuadhimisha siku ya Lishe nchini ili Taifa liweze kujadili masuala ya lishe na kujenga jamii bora ya Watanzania.

Kwa upande wake Mhe Josephat S. Kandege Naibu Waziri (Afya OR - TAMISEMI) amesema kuwa upimaji ujao utakuwa mzuri kwani wote wanafanya vizuri lakini pia kuanza kutegemea bajeti yetu sisi wenyewe.

Awali akitoa maelezo kabla ya ufunguzi wa mkutano kazi huo, Katibu Mkuu Ofisi ya Rais TAMISEMI Mhandisi Joseph Nyamhanga, amesema kuwa chimbuko la lishe ni lishe duni ambayo imekuwa ikiwakabili watoto wpatao asilimia 34 sawa na watoto milioni 30 nchini, watoto walio chini ya miaka mitano kuwa na upungufu wa damu, ukondefu wa watoto na upungufu wa damu kwa akina wanaotarajiwa kujifungua na waliojifungua.

Nyamhanga amesema kuhusu changamoto kwa baadhi ya halmashauri kutokuwa na Maafisa Lishe, tayari ameiagiza mikoa na halmashauri hizo kuweka katika mpango wa bajeti ili Maafisa hao waweze kuajiriwa kukabiliana na upungufu uliopo. Aidha, amesema utekelezaji wa masuala ya lishe umefikia asilimia mia moja katika mikoa ijapokuwa mafanikio yanatofautiana kati ya mkoa mmoja hadi mwingine.

Naye Bw. Kilumba Wakulichombe ambaye ni Mwakilishi wa Mwenyekiti wa Chama cha Wazazi wa Watoto wenye vichwa vikubwa na mgongo wazi, amesema kuwa zipo hospitali maalum ambazo zinahudumia watoto wenye vichwa vikubwa na mgongo wazi ambazo ni Taasisi ya Mifupa Dar es Salaam (MOI), hospitali ya Rufaa Bugando (Mwanza), hospitali ya KCMC (Kilimanjaro), hospitali ya LCM (Arusha), hospitali ya Rufaa ya mkoa wa Mbeya na hospitali ya HYDOM mkoani Manyara.

                            Anaandika Fred Kibano