Serikali Yaagiza Halmashauri Kusimamia Zoezi la Uwekaji wa Heleni za Mifugo

Imewekwa tar.: August 5th, 2022

Na Fred kibano, Dodoma

Serikali imewaagiza Wakurugenzi wa Halmashauri nchini kusimamia kikamilifu zoezi la utambuzi, usajili na ufuatiliaji wa mifugo pamoja na sensa ya mifugo ifikapo Septamba 30 mwaka huu ili kuongeza thamani na kuzuia wizi wa mifugo.

Kauli hiyo imetolewa na Waziri wa Mifugo na Uvuvi Mhe. Mashimba Ndaki wakati akifungua maonesho ya Nanenane Jijini Dodoma hivi leo ambapo amezitaka Mamlaka hizo pamoja na Wafugaji kuhakikisha zoezi hilo linakamilika kama ilivyopangwa na Serikali ili kufikia malengo mbalimbali.

“niziombe sana Halmashauri washirikiane na mtoa huduma wa heleni hizi lakini wanao wajibu wa kupata Mkandarasi wa kuweka heleni kwenye Wilaya zao ili zoezi hili likamilike tunapofika tarehe 30 Septemba mwaka huu” alisema Mhe. Mashimba Ndaki.

Amesema zoezi hilo litawasaidia Wafugaji kufuga kibiashara, kuongeza thamani ya mifugo na kuzuia wizi wa mifugo ambao imekuwa moja ya changamoto kwenye Sekta ya mifugo nchini..

Aidha, amewataka wafugaji kushiriki kikamilifu katika sensa ya mifugo ili kujua idadi kamili ya mifugo badala ya kutumia njia ya makadirio ambayo kwa sasa inasema tunao mifugo milioni 30.3, lakini pia amewaasa wafuhgaji kuvuna mifugo ikiwa na siha njema kwa kuwa hali ya malisho hairidhishi kwani mifugo inaweza kufa kwa njaa.

Kuhusu kilimo kwa ujumla wake amesema Serikali imekusudia kutoka kwenye kilimo cha kujikimu kwenda katika kilimo cha kibiashara ambapo ameziasa Taasisi za Utafiti na Vyuo Vikuu kuona namna ambavyo wanaweza kupeleka teknolojia ya mazao yaliyofanyiwa utafiti kwa wananchi kwa wingi pamoja na bei kushusha bei za teknolojia hizo kwa wakulima na wafugaji nchini.

Dkt. Charles Mhina Kaimu Katibu Mkuu (MIFUGO) amesema katika mwaka wa fedha 2022/23 Wizara imepanga kununua pikipiki 1,200 kwa ajili ya Maafisa Ugani ili waweze kuwafikia wakulima mahali walipo na kwa wakati.

Naye Dkt. Rashid Tamatama Katibu Mkuu (UVUVI) amesema katika mwaka huu wa fedha jumla la vizimba vipya 731 vya kufugia samaki vitaandaliwa na kugawiwa kwa wafugaji wadogo kwani ufugaji wa vizimba ndio unaochangia pato kubwa la samaki nchini ambapo inakadiriwa kuwa vizimba hivyo vitaongeza pato la tani 4,000 kwenye soko la samaki.

Awali akimkaribisha Waziri wa Mifugo na Uvuvi Mashimba Ndaki, Mkuu wa mkoa wa Dodoma Mhe. Rosemary Senyamule amesema mkoa wa Dodoma kwa mwaka huu 2022 umevuna mazao ya kilimo kwa asilimia 55 kutokana na uhaba wa mvua za masika lakini pia mkoa una eneo la malisho ambalo ni asilimia 29 ya ardhi, pia kuna mifugo milioni 5.64 ambapo mifugo ya asili ni asilimia 90

Senyamule amesisitiza kuwa mkoa wa Dodoma utatumia teknolojia ya ufugaji wa kisasa ikiwa ni pamoja na ufugaji wa samaki kwa lengo la kujikimu kwa zao la samaki.

Kauli mbiu ya maonesho ya mwaka 2022 inasema, "Ajenda 10/30 “Kilimo ni Biashara, Shiriki Kuhesabiwa kwa Mipango Bora ya Kilimo, Mifugo na Uvuvi”