Serikali ya Tanzania yapongezwa utekelezaji miradi ya GPE LANES II na EP4R

Imewekwa tar.: November 22nd, 2024

Na Fred Kibano, Bunda, Mara

Serikali ya Tanzania imepongezwa kwa kutekeleza miradi ya Elimu inayozingatia thamani halisi ya fedha, ubora wake na ushiriki wa jamii inapotekelezwa miradi hiyo.

Kauli hiyo ya Serikali imetolewa na Mkurugenzi Msaidizi anayeshughulikia Elimumsingi Ofisi ya Rais TAMISEMI, Mwl. Suzan Nussu Nyarubamba akimwakilisha Naibu Katibu Mkuu (ELIMU) Ofisi ya Rais TAMISEMI Atupele Mwambene leo tarehe 22 Novemba, 2024 wilayani Bunda mkoani Mara ambapo alisema wafadhiri hao wa GPE na EP4R wamekuja kujionea wenyewe kama utekelezaji wa miradi ya GPE LANES II, GPE TSP na EP4R imefanyika kama ilivyopangwa kwa ushirikiano na Serikali. 

“wageni wameridhika kwa kile walichokiona, kwanza thamani ya fedha kwenye miradi waliyotoa fedha, lakini pili ubora wa kazi zilizofanyika na tatu ushiriki wa Wadau mbalimbali katika shughuli zote za elimu kwani kila mahali tulipopita tumekuta Uongozi wa Kijiji, wajumbe wa Kamati ya Shule, walimu na baadhi ya wazazi wakitupokea na kuelezea utekelezaji wa miradi hiyo wakiwa kama sehemu ya timu inayotekeleza miradi” alisisitiza Mwl. Suzan Nussu Nyarubamba. 

Aidha, Mwl. Nyarubamba alisema baadhi ya maelekezo ya Mheshimiwa Rais, Dkt. Samia Suluhu Hassan yametekelezwa kwa mfano Kampeni ya utoaji wa Lishe Bora kwa Watoto kwani kwenye shule walizopita na ugeni huo wamekuta watoto wanapatiwa chakula kulingana na vyakula vilivyopo kwenye maeneo yao hali inayopelekea mahudhurio kuwa mazuri kama ilivyo kwenye shule mpya ya msingi Ibwagalilo walipofanya ziara ambayo wanafunzi wake walikuwa wakienda umbali mrefu shule ya msingi Namalebe. 

Balozi wa Sweden nchini Tanzania Mheshimiwa Charlotta Ozaki Marcias alisema amefanya ziara hiyo na Wadau wa GPE, Wadau wengine na Serikali kwa kutembelea baadhi ya miradi shuleni kwenye mikoa ya Arusha na Mara ili kuona uhusiano wao na Serikali unadumishwa kwa kuangalia kazi zilizofanyika kwenye miradi ya elimu kama zimetekelezwa kwa mujibu wa malengo ya Serikali ya Tanzania.

Balozi Marcias pia ameridhika na jinsi elimu ilivyoimarishwa nchini kupitia Wizara ya Elimu, Sayansi na Teknolojia kwa kushirikiana na Ofisi ya Rais Tawala za Mikoa na Serikali za Mitaa, lakini pamoja na hayo amejionea mahitaji makubwa yaliyoongezeka kutokana na kuongezeka kwa idadi ya wanafunzi shuleni hususani baada ya Serikali ya Tanzania kuboresha Mfumo wa elimu na kuanza kutekeleza Sera ya Elimu Bila Ada.

Kwa upande wake Mwalimu Mkuu Shule ya Msingi Ibwagalilo Isack Sore ameishukuru Serikali na Wafadhiri wa GPE na EP4R waliofanya ziara shuleni kwake kwa kuwapatia fedha tangu mwaka 2019/2020 hadi mwaka 2023/2024 kwani walipokea shilingi 433,200,000 na kujenga madarasa 13, nyumba moja ya mwalimu, jengo la utawala, ofisi za walimu na matundu ya vyoo 42 ikiwa ni fedha kutoka GPE LANES II shilingi 46,600,00, EP4R shilingi 346,600,000 na Covid 19 shilingi 40,000,000.

Ziara hiyo ya siku nne imewahusisha Wafadhiri wa GPE na EP4R (Serikali za Sweden na Uingereza) na Serikali ya Tanzania ambayo imefanyika kwenye mikoani ya Arusha na Mara ili kujionea utekelezaji wa miradi hiyo ya Elimu chini ya GPE LANES II na Lipa Kulingana na Matokeo (EP4R) ilivyotekelezwa.