Serikali kuboresha waraka wa kudhibiti utoro mashuleni

Imewekwa tar.: December 13th, 2019

Mkurugenzi Msaidizi  Msingi na  uendelezaji  wa Sera, Wizara ya Elimu, Sayansi na Teknojia Mwalimu Yesse Kanyuma amesema Serikali ipo kwenye utaratibu wa kurekebisha waraka wa kudhibiti utoro ambao pamoja na mambo mengine utabainisha wajibu wa kila mdau.

Ameyasema hayo leo jijini hapa wakati wa kufunga Kongamano la 14 la Umoja wa Wakuu wa Shule za Sekondari Tanzania (TAHOSA).

Manyama amesema ili kudhibiti utoro mashuleni Serikali iko katika hatua za mwisho za kuandaa waraka ambao utatumika kudhibiti utoro wa wanafunzi.

“Tunataka kuja na mkakati wa kuhakikisha tunadhibiti utoro, hivyo tutakuja na waraka ambao utabainisha wajibu wa kila mdau katika hili na pia siku zitapunguzwa zitakuwa kidogo na hazitakuwa siku 90 tena.

Amefafanua kuwa waraka huo utaangalia ni namna gani mwalimu wa darasa, mkuu wa shule, mwalimu wa nidhamu wanaweza kutimiza wajibu wao katika suala zima la usimamizi katika suala zima la utoro katika shule.

Kanyama amesema taarifa zilizopo ni kwamba mtoto anapopotea shuleni wakati mwingine hakuna mawasiliano ya aina yoyote ile aidha, mzazi au kiongozi wa serikali eneo husika ili kujua ni tatizo gani limemsibu mwanafunzi huyu na kama mtoro katika siku zote hizo

“Kumekuwa na pengo kubwa kati ya uongozi wa shule na wazazi au walezi na mtoto mwenye, kwahiyo waraka ukiwa tayari ninyi mtakuwa wasimamizi wakuu, “ amesema Kanyuma.

Amesema suala hilo linakwenda sambamba na wakuu wa shule kuweka hai kamati za nidhamu na ushauri ili kuondoa hali ya sasa ya fukuza fukuza ya wanafunzi.

“Si lengo la Serikali kuwafukuza watoto shule, lengo la Serikali ni kuhakikisha watoto wote wanaodahiliwa wanamaliza masomo yao, kwa kuwa Serikali inapata shida pale mwalimu anapoandaa nyaraka inayotamka mtoto kufukuzwa shule, na hii inaonesha tumeshindwa kutimiza wajibu wa kufanya watoto wamalize masomo yao,” amesema Manyuma

Ameendelea kusema kuwa Serikali haipendi kutoa adhabu kwa wanafunzi ama kuwafukuza shule wanafunzi ambao ni watoro mashuleni bali inataka  utaratubu, kwa kuwa mfumo wa sasa unaotumika haujakidhi mahitaji

Hata hivyo, Kanyuma ametumia fursa hiyo kuwataka walimu wakuu kuhakikisha wanafuata sheria, kanuni na taratibu katika kuendesha shule na kuwa viongozi wazuri wanaowaongoza walimu wenzao ili kuisadia jamii inayoizunguka.

Amesema kwa kufuata sheria, kanuni na taratibu kutasaidia kuleta ufanisi katika shule zao na kuondoa mlolongo wa mashauri ya walimu kwenye Tume ya utumishi wa Walimu (TAC)

“Haiwezekani mwalimu ana kwenda kinyume na taratibu, humuoni hata mara moja, hii inachangia kuchelewesha au kutotoa maamuzi sahihi katika mashauri ya utovu wa nidhamu yanapofika Tume, Msiwe waogoa katika kutoa maamuzi pale mwalimu anapoenda kinyume na utaratibu” amesema Kanyuma

Naye Kaimu Mkurugenzi Idara ya Elimu, Ofisi ya Rais Tawala za Mikoa na Serikali za Mitaa Bw. George Jilamba  ameeleza madhumuni ya kongamano hilo na kusema  kuwa  ni kuwajengea uwezo wakuu wa shule za Sekondari nchini kusimamia  sekta ya elimu katika maeneo yao na kuleta mabadiliko.