Rais Magufuli Aagiza Ukamilishaji Ujenzi wa stendi ya Mbezi

Imewekwa tar.: October 8th, 2020

Na Fred Kibano, Dar es Salaam

Rais wa Jamhuri ya Muungano wa Tanzania Mheshimiwa Dkt. John Pombe Magufuli na Mgeni wake Rais wa Malawi Dkt. Lazarus McCarthy Chakwera wameweka jiwe la msingi katika kituo cha mabasi kilichopo Mbezi Louis Jijini Dar es Salaam ambapo Rais Magufuli ameagiza kukamilika kwa wakati ujenzi wa stendi hiyo.

Rais Magufuli ameyasema hayo mbele ya mgeni wake Rais wa Malawi Dkt. Lazarus McCarthy Chakwera kwa kumwagiza Mkandarasi wa Kampuni ya Hainan International Ltd kumaliza ujenzi wa stendi hiyo ifikapo Novemba 30, mwaka huu.

Rais Magufuli amesema kwa mujibu wa mkataba uliosainiwa hapo awali, ujenzi ulikuwa ukamilike mwezi Julai, 2020 lakini mpaka sasa haujakamilika pasipo kuwa na sababu za msingi huku kisingizio kikubwa kikiwa ugonjwa wa korona.

“haiwezekani watu watumie visingizio vya korona, huyu mkandarasi alitakiwa awepo hapa, kwa hiyo waziri huyu mkandarasi alitakiwa aanze kukatwa fedha”

Amesema kuwa iwapo Mkandarasi huyo atachelewa kumaliza ujenzi mwezi Novemba basi atapaswa kukatwa fedha kwa kuwa hakuna sababu ya msingi inayozuia ukamilishwaji wa mradi huo kwa wakati.

Katika hatua nyingine Rais Magufuli amesema aliidhinisha jumla ya shilingi Bilioni 51 lakini imeongezeka hadi kufikia bilioni 71 kwa kuongezwa daraja ambalo amelikagua kuona gharama halisi.

Awali Rais wa Malawi Dkt. Lazarus McCarthy Chakwera amepongeza ujenzi wa stendi ya mabasi ya Mbezi Louis na kusema ni kituo muhimu kwa nchi za SADC (Kusini mwa Afrika) hasa katika kuchochea uchumi na biashara na sio tu kwa nchi za Malawi na Tanzania bali pia nchi za Afrika.

Akitoa maelezo ya awali ya mradi, Waziri wa Nchi Ofisi ya Rais TAMISEMI Selemani Jafo amesema ujenzi wa stendi kuu ya mabasi ya Mbezi Louis Dar es Salaam umegharimu jumla ya shilingi bilioni 71 ikiwa ni pamoja na daraja na kitachukua mabasi 3456, kutakuwa na maegesho ya magari juu na chini, mradi umetoa  ajira 600 kipindi hiki cha ujenzi na matarajio kwa hapo baadae ni mapato ya shilingi bilioni 10 kwa mwaka ikiwa ni pamoja na ajira zipatazo 10,000

Jafo amesema changamoto iliyochelewesha mradi ni pamoja na ugonjwa wa korona na mpaka sasa ujenzi umefikia  asilimia 85.