Rais Dkt. Magufuli Aweka Jiwe la Msingi Ujezi wa Hospitali ya Mji Tunduma

Imewekwa tar.: October 6th, 2019

Rais wa Jamhuri ya Muungano wa Tanzania Mhe. Dkt John Pombe Joseph Magufuli ameweka jiwe la Msingi katika ujenzi wa Hospitali ya Mji wa Tunduma yenye hadhi ya Hospitali ya Wilaya ikiwa ni sehemu ya ziara yake katika Mkoa wa Songwe leo.

Rais Magufuli ameupongeza uongozi wote wa Mkoa wa Songwe, Mji wa Tunduma na Ofisi ya Rais TAMISEMI mara baada ya kuweka jiwe la msingi katika Mradi huo kwa kusimamia utekelezaji wa miradi mbalimbali ikiwa ni pamoja na ujenzi wa hospitali hiyo ambayo itagharimu kiasi cha shilingi bilioni 2.5.

Aidha, Rais Magufuli ameridhia ombi la Mkuu wa Mkoa wa Songwe Brigedia  Jenerali Nicodemus Mwangela la kupatiwa kiasi cha shilingi bilioni 2.4 ili kukamilisha awamu ya kwanza ya ujenzi wa hospitali ya Mji Tunduma.

Ameagiza fedha hizo zipelekwe haraka na ujenzi wa hospitali ya Mji ukamilike ili iwanufaishe wananchi wa Mji wa Tunduma na Wilaya ya Momba ambao hawajawahi kuwa na hospitali ya Wilaya tangu Uhuru.

Kwa upande wake Waziri wa Nchi Ofisi ya Rais TAMISEMI Mhe. Selemani Jafo amempongeza Mhe. Rais Dkt. John Pombe Magufuli kwa uongozi mahiri ambao umewezesha wananchi kupata huduma bora kwa kujenga vituo vya afya zaidi ya 350 na hospitali 67 za Wilaya katika kipindi kifupi jambo ambalo halijawahi kutokea tangu Uhuru.

Pia Waziri Jafo amesema uboreshaji wa kituo cha Afya Tunduma kinachotumika kwa hivi sasa kumeimarisha huduma za Afya kwa wananchi wa Tunduma na raia kutoka nchi za jirani.

Awali akitoa neno, Waziri wa Afya, Maendeleo ya Jamii, Jinsia, Wazee na Watoto Mhe. Ummy Mwalimu amesema jitihada za Mhe. Rais Dkt. John Pombe Joseph Magufuli zitawezesha upatiakanaji wa matibabu ya rufaa ndani ya Mkoa wa Songwe na hivyo kuwapunguzia adha wananchi hao kufuata huduma hizo mikoa na wilaya za jirani.

Mhe Rais Magufuli anatarajia kuendelea na ziara yake mkoani Rukwa ambapo atakagua na kufungua miradi mbalimbali katika sekta ikiwa ni pamoja na kuongea na Watanzania kama ilivyo ada yake.

          Anaandika Fred Kibano