PROF.SHEMDOE ARIDHISHWA NA UTEKELEZAJI WA MIRADI CHALINZE

Imewekwa tar.: November 17th, 2022

OR-TAMISEMI

Katibu Mkuu Ofisi ya Rais Tawala za Mikoa na Serikali za Mitaa,Prof. Riziki Shemdoe ameridhishwa na utekelezaji wa miradi ya maendeleo katika Halmashauri ya Wilaya ya Chalinze , Mkoani Pwani

Pro.Shemdoe leo Novemba 16, 2022 amekagua   miradi mbalimbali ya maendeleo inayotekelezwa katika Halmashauri hiyo

Amekagua miradi ya  ujenzi wa vyumba vya madarasa kwa ajili ya wanafunzi watakaoanza masomo ya kidato cha kwanza Januari 2023, ujenzi wa madarasa katika shule ya Sekondari Chahua,na shule ya Sekondari Lugoba.

Prof.  Shemdoe ameipongeza Halmashauri hiyo kwa usimamizi wenye weledi wa kuhakikisha madarasa hayo yanajengwa  kwa viwango stahiki.

“Nikupongeze Mkurugenzi na timu yako kwa usimamizi makini, madiwani na uongozi wa Shule kwa maana ya wakuu Shule wote wanaoendelea na utekelezaji wa miradi hii nawaomba muongeze bidii mara ifikapo tarehe 15 Desemba, madarasa yawe yamekamilika.” amesisitiza Prof Shemdoe

Vilevile, Prof. Shemdoe amekagua  Ujenzi wa soko la Bwilingu na kukagua   ujenzi wa vibanda vya wajasiriamali vinavyoendelea kujengwa kuzunguka soko  jumla ya vibanda hivyo ni 150 na vinajengwa kutokana fedha za mapato ya ndani ya Halmashauri ili kuwezesha  wananchi kiuchumi.

Pia Prof Shemdoe amekagua hospitali ya Wilaya ya Msoga na kukagua Ujenzi wa jengo la  Matibabu ya Dharura(EMD) kinachoendelea kujengwa katika hospitali hiyo na kumshukuru Rais Mstaafu wa awamu Nne Dkt. Jakaya Mrisho Kikwete kwa kuwezesha upatikanaji wa mradi huo unaotekelezwa kwa faida ya watanzania wanapopatwa na ajali na kuwa na uhakika wa matibabu wakati wowote.

Aidha, amekagua  vifaa tiba mbalimbal vilivyonunuliwa kutokana na fedha za Mapato ya ndani ya Halmashauri na fedha kutoka Serikali kuu ambavyo ni  vifaa vya Mionzi (X-ray)na vipimo vya moyo vinavyopima umeme wa moyo kwa binadamu.

Amewapongeza viongozi wa Halmashauri  kwa hatua kubwa za maendeleo zinazofanywa hasa katika suala zima la usimamizi wa miradi ya maendeleo inayotekelezwa katika Halmashauri hiyo.