MSIKWAMISHE MIRADI YA SEQUIP - Silinde

Imewekwa tar.: June 29th, 2022

Na Fred Kibano

Naibu Waziri Ofisi ya Rais (TAMISEMI) Davidi Silinde, amesema kwa uzembe wowote utakaofanyika kwa ajili ya kukwamisha Mradi wa Kuboresha Elimu ya Sekondari (SEQUIP) wahusika watachukuliwa hatua kali za kisheria.

Naibu Waziri Silinde ametoa kauli hiyo Jijini Dodoma hivi leo wakati akifungua mafunzo ya kuwajengea uwezo maofisa wa mazingira kuhusu masuala ya usalama wa Mazingira na Jamii katika kutekeleza mradi wa SEQUIP.

Amesema kwa mtendaji ambaye atajaribu kukwamisha Mradi wa Kuboresha Elimu ya Sekondari (SEQUIP) hataweza kuvumiliwa na kabla hajachukuliwa hatua ni lazima ajitafakari.

Silinde amesema kuwa Serikali kupitia mradi wa kuboresha mazingira ya kufundishia na kujifunzia kwa Elimu ya Sekondari (SEQUIP) katika mwaka wa fedha 2020/22 Serikali imetumia fedha kwenda kwenye Mamlaka za Serikali za Mitaa kiasi cha shilingi billion 139.57 kwa ajili ya ujenzi wa shule mpya za sekondari.

Amesema kuwa Serikali imetumia fedha kwenye mamlaka za serikali za mitaa takribani sh.bilioni 139.57 kwa ajili ya ujenzi wa shule mpya za sekondari 243 zikiwemo shule 10 za sekondari za bweni za Mikoa kwa ajili ya wasichana na shule 232 za sekondari za kata katika kata ambazo hazina shule na kata zenye wanafunzi wengi ukilinganisha na miundombinu ya shule iliyopo.

Silinde amesema kuwa utekelezaji wa Mradi huo ni kwa ajili ya kutatua changamoto ya ongezeko la wanafunzi wanaoandikishwa katika shule za sekondari nchini kutokana na utekelezaji wa sera ya elimu bila malipo ambapo idadi ya wanafunzi katika shule za msingi na sekondari imeongezeka.

"Mradi huu wa SEQUIP umekuja wakati ambapo kumekuwa na mwitikio mkubwa katika uandikishaji wa wanafunzi na hivyo kusababisha ongezeko la Mahitaji ya miundombinu kwa ajili ya kupokea wanafunzi wanaijiunga na Elimu ya Sekondari" alieleza Silinde.

Amesema kwa mfano katika mwaka 2021 wanafunzi wa elimu ya Awali, Msingi na Kidato cha kwanza walikuwa 3,469,275 ambapo kumekuwa na ongezeko la wanafunzi 472,969 walioandikishwa mwaka 2022 na kufikia wanafunzi 3,942,244 sawa na ongezeko la asilimia 14”

Kwa upande wake Mkurugenzi wa Elimu TAMISEMI, Ephraim Simbeye akiongea kwa niaba ya Naibu Karibu Mkuu TAMISEMI Dkt.Charles Msonde amesema kuwa mradi wa SEQUIP  unatarajiwa kutekelezwa katika eneo la Elimu ya Sekondari kidato cha kwanza hadi cha sita kwa kipindi cha miaka mitano kuanzia 2020/2021hadi 2024/2025.

Alisema kuwa mradi huo unatekelezwa kwa utaratibu wa Lipa Kulingana na Matokeo ambapo motisha ya fedha hutolewa kwa Serikali baada ya kufikia matokeo yaliyokubalika kwa kuzingatia viashiria vya mradi.

Aidha Simbeye alisema kuwa utekelezaji wa mradi huo unatarajiwa kuleta mafanikio na maboresho makubwa katika eneo la Elimu ya sekondari.

Amesema utawasaidia wanafunzi wapatao milioni 6.5 kumaliza elimu ya sekondari na stadi za maisha ambapo kati yao wanafunzi wasichana ni milioni 3.2 wakiwemo wasichana waliokatisha masomo yao kwa sababu mbalimbali.

Naye Julius Achiula Mtaalam wa Mazingira mkoa wa Arusha na Mratibu wa SEQUIP Kanda ya Kaskazini ikihusisha mikoa ya Kilimanjaro, Arusha, Manyara na Tanga ametoa ombi la kupatiwa vitendea kazi ili kujengewa uwezo pamoja na kuwa wamejengewa uwezo na hayo yakiwa mafunzo ya awamu ya tatu.