Mkandarasi Sinani ashindwa kazi ya Ujenzi wa Daraja la Mbuchi & Mbwera

Imewekwa tar.: June 8th, 2019

Waziri wa Nchi Ofisi ya Rais Tawala za Mikoa na Serikali za Mitaa Mhe.Selemani Jafo amesema mkandarasi aliyepewa kazi ya kujenga daraja linalounganisha Kata ya Mbuchi  na Mbwera hana uwezo wa kujenga daraja hilo kutokana na kusua sua kwa ujenzi  ambao umechukua zaidi ya miaka miwili na bado haujakamilika.

Waziri Jafo ameyasema hayo wakati wa ziara yake Wilayani humo kukagua miradi mbalimbali ya maendeleo inayotekelezwa katika Wilaya hiyo na kusikitishwa na ujenzi wa daraja hilo ambao haukumridhisha.

“Wananchi wa vijiji hivi wamepata tabu kwa muda mrefu  kwa kutokuwa na mawasiliano ya uhakika kwa  kukosa kiunganishi ambacho ni daraja hili wamekuwa wakitumia mtumbwi tena kwa kulipa fedha kuvuka tu kutoka upande mmoja hadi mwingine.

Serikali iliona tatizo hilo na kuleta fedha za kutatua changamoto hii sasa Mkandarasi anataka anachukua kazi kwa sababu ameona fedha wakati hana uwezo kwa kujenga daraja la namna hii” Alisema Jafo.

Huyu Mkandarasi anaweza kujenga barabara  na madaraja lakini sio daraja la namna hii, toka nilipokuja hapa Januari 2018 nlikuta  Mkandarasi huyu keshaanza kazi hii  halmashauri zingine zimeshajenga madaraja mengi ya namna hii na yamekamilika lakini hapa mpaka sasa hivi hakuna kitu kilichofanyika aliongezea Mhe. Jafo.

Kutokana na hali hiyo Mhe Jafo ameagiza uongozi wa Halmashauri ya kibiti  ifikapo Septemba,2019 endapo Mkandarasi huyo hajakamilisha daraja hilo ifanyike tathmini ya kazi  na kisha mkataba usitishwe.

“Mkandarasi huyo asiongezewe fedha tena kwa sasa kwa kuwa muda wake umekwisha, afuatiliwe na kuchunguzwa utendaji wa kazi zake kwenye Halmashauri zingine ambazo amepewa Kandarasi” Alisema Jafo.

Daraja hilo ambalo likikamilika litabadilisha maisha ya wananchi wa Mbuchi-Mbwera  litagharimu Tsh Bil 2.4 na lilitarajiwa kukamilika tangu mwezi Novemba 2018 na mpaka sasa Mkandarasi Sinani amekwishapewa Tsh Mil. 700.

Wananchi wa Kata ya Mbuchi Tarafa ya Mbwera Wilayani Kibiti kwa kipindi kirefu wametaabika na adha ya kukosa Daraja linalounganisha vijiji hivyo viwili vyevye wakazi zaidi ya elfu 24.

Kukosekana kwa Daraja hilo kumepelekea kukatika kwa mawasiliano ya Uhakika baina ya wananchi wa Mbuchi na wale wa upande wa Pili wa Bwera, kuongeza gharama za maisha na hata kupelekea maafa kwa wakina mama wanaojifungua na wagonjwa kwa sababu ya kukosa njia rahis na nafuu ya kuwafikisha katika huduma za Matibabu.

Vijiji hivyo ambavyo vimetengenishwa na Mto Mberambe ambao ni Tawi la Mto Rufiji na kutengeneza Delta ya Kaskazini tangu kuanzishwa kwake havijawahi kuwa na Daraja la kuwaunganisha  katika shughuli zao za kila siku za kila siku za kujiletea Maendeleo