MCHENGERWA APONGEZA MKOA SINGIDA KWA USIMAMIZI MIRADI YA MAENDELEO

Imewekwa tar.: December 13th, 2023

OR-TAMISEMI

WAZIRI Ofisi ya Rais, Tawala za Mikoa na Serikali za Mitaa Mhe. Mohamed Mchengerwa, ameupa kongole mkoa wa Singida kwa kusimamia vyema miradi mbalimbali ya maendeleo, inayotekelezwa na katika halmashauri zote Saba za mkoa huo, ikiwemo Ile ya afya, elimu na miundombinu ya Barabara.

Mhe. Mchengerwa ametoa kauli hiyo Desemba 13, 2023, katika ziara yake mkoani Singida, kwa ajili ya kukagua miradi mbalimbali ya maendeleo ikiwemo kituo cha Afya cha Kata ya Mtipa ambacho ujenzi wake umetekelezwa kupitia mapato ya ndani ya Manispaa ya Singida, kwa gharama ya zaidi ya Sh. Milioni 500.

"Kipekee niupongeze uongozi wa mkoa wa Singida, chini ya mkuu wa mkoa huu, ndugu yangu Peter Serukamba, nimeridhika na ujenzi huu uliotekelezwa kwa fedha za makusanyo yenu ya ndani, mradi huu ni wa kiwango, naagiza halmashauri zote nchini, ziige Manispaa ya Singida, namna ya kutekeleza miradi kwa fedha za mapato ya ndani," alisema Mchengerwa.

Mradi wa Kituo cha Afya Mtipa, ujenzi wake ulianza mapema mwaka huu kwa fedha za na ukakamilika ndani ya muda, ukiwa na lengo la kuwaondolea adha wananchi wa Kata hiyo, kusafiri umbali mrefu kufuata huduma ya afya, mwendo wa zaidi ya kilomita 15.

Kutokana na juhudi hizo, Waziri Mchengerwa amesema  TAMISEMI imeunga mkono ujenzi huo kwa kuipatia Manispaa ya Singida fedha Sh. Milioni 150/-, ili zitumike kununulia vifaa tiba, kwa ajili ya Kituo hicho cha afya muanza kuhudumia wananchi wa Kata hiyo.

Wakati huo huo Waziri Mchengerwa amekabidhi magari sita mapya, kwa ajili ya halmashauri za mkoa huo, yatakayotumika kusimamia na kufuatilia shughuli za afya mkoani Singida.

Kadhalika Mchengerwa ameagiza Uongozi wa Mkoa wa Singida, kuhakikisha magari hayo, yanatunzwa na kutumika kama ilivyokusudiwa, Ili kutoa huduma Bora kwa wananchi wa mkoa wa Singida.

Kwenye salamu zake za kushukuru, Mstahiki Meya wa Manispaa ya Singida, Yagi Kiaratu, alisema pamoja na changamoto mbalimbali zilizopo, lakini amemshukuru Waziri Mchengerwa, kwa Serikali kuipatia Manispaa hiyo Sh. Milioni 150/-, kwa ajili ya kununulia vifaa tiba vya Kituo cha afya Mtipa.

Aidha Kiaratu, aliishukuru pia Serikali kuipatia Manispaa ya Singida, majengo ya iliyokuwa hospitali ya mkoa, ambayo Sasa yamekuwa chini ya Manispaa hiyo, sasa rasmi yakiwa ni hospitali ya Manispaa ya Singida, na hivyo kupunguza adha ya wakazi wa Singida mjini, kukosa huduma za Afya.