Manyara, Shinyanga wang’ara mbio za mita 1500

Imewekwa tar.: June 16th, 2021

Na Mathew Kwembe, Mtwara

Wanariadha Lemarikwa Nguyaki wa Manyara na Salma Charles wa Shinyanga wameng’ara katika fainali za UMITASHUMTA mwaka 2021 baada ya kushinda mbio za mita 1500 kwa wavulana na wasichana katika michezo iliyofanyika leo katika uwanja wa Chuo cha ualimu Mtwara.

Ngoyaki ambaye ni mwanafunzi wa darasa la sita katika shule ya msingi Fatimbo wilayani Kiteto alimaliza mbio hizo kwa kuwashinda wanariadha wenzake 12 baada ya kutumia dakika 4:18:12 huku akiwaacha wenzake Ashraka Katambo wa Lindi na Maseta Juma wa Tabora ambao walishika nafasi ya pili na ya tatu.

Aliyeshika nafasi ya nne kwenye mbio hizo ni Mwanafunzi John Agustino wa Manyara na nafasi ya tano ilikwenda kwa Shija Atanas kutoka Simiyu ambaye alimaliza mbio hizo baada ya kutumia dakika 4:23:37

Kwa upande wa wasichana, mwanafunzi Salma Charles ambaye anasoma darasa la saba katika shule ya msingi Iponyahoro Wilayani Ushetu aliwashinda Mirembe Mathias wa Mwanza na Lois Simon wa Mara baada ya kukimbia kwa dakika 4:48:07.

Nafasi ya nne na tano  zilichukuliwa na wanafunzi Kenfiwa Kilasi wa Geita na Aneth Masai wa Kigoma ambao walikimbia kwa dakika 4:55:97 na dakika 4:56:34.

Nafasi ya sita hadi 12 zilichukuliwa na wanariadha Mary Adamu wa Rukwa, Maria Spriani wa Mwanza, Rehema Wilson wa Dodoma, Wende Kijja wa Simiyu, Neema Shija wa Mbeya, Laitnes Msemwa wa Iringa, Winfrida Mwita wa Mara na Ngoo John wa Simiyu ambaye alishika nafasi ya 13.

Kwa upande wa mbio za mita 200 aliyeshinda kwenye fainali ya UMITASHUMTA kwa wavulana ni Immanuel Amos wa Simiyu ambaye alimaliza mbio hizo kwa kutumia sekunde 24: 82 na nafasi ya pili ilishikwa na Adam Ally wa Dodoma na Samwel Yohane wa Singida ambaye alishika nafasi ya tatu.

Kwa wasichana nafasi ya kwanza imechukuliwa na mwanariadha Jeska Leonard ambaye ni mwanafunzi wa shule ya St Patrick Arusha aliyetumia sekunde 28:44 kumaliza mbio hizo na kuwaacha wenzake watano.

Jesca alifuatiwa  na wanafunzi Marysiana Matejo wa Mwanza na Zainabu Masele wa Geita ambao alishika nafasi ya pili na ya tatu.

Nafasi ya nne ilichukuliwa na Jemima Juma wa Dodoma,huku nafasi ya sita ilishikwa na Hadija Saidi wa Tabora na Ashura Ngusa wa Shinyanga ambaye alishika nafasi ya tano.

Katika fainali za kuruka chini kwa wavulana mshindi wa fainali hizo ni Visa Idd wa Mtwara ambaye aliruka urefu wa mita 5:99, na kufuatiwa na Emmanuel Michael wa Kigoma aliyeruka kwa urefu wa mita 5:97 na nafasi ya tatu ilishikwa mwanafunzi Julius Simon wa Arusha ambaye aliruka urefu wa mita 5:87.

Kwa wasichana nafasi ya kwanza ilichukuliwa na Eliza Kelali wa Mara ambaye aliruka urefu wa mita 4:57, na kufuatiwa na Ester Charles wa Singida aliyeruka urefu wa mita 4:30 na nafasi ya tatu ilishikwa na Jenipher Rasalo wa Mara ambaye aliruka urefu wa mita 4:23.

Mashindano ya riadha kwenye UMITASHUMTA inatarajiwa kukamilika kesho ambapo fainali za mita 100 na mbio za kupokezana kijiti zitafanyika.