Maafisa Tarafa na Watendaji wa Kata Watakiwa kuwa kiungo kizuri cha Serikali katika ngazi ya Msingi

Imewekwa tar.: August 6th, 2024

Na. Fred Kibano, Manyara

Katibu Tawala Msaidizi Utawala na Menejimenti ya Rasilimali Watu Mkoa wa Manyara Bw. Dominic Mbwette amewataka Maafisa Tarafa na Watendaji wa Kata kuwa kiungo kizuri cha Serikali kwenye maeneo yao kwa kukagua na kufuatilia miradi ya maendeleo ili thamani ya fedha za Serikali ionekane.

Bw. Dominic Mbwette ameyasema hayo leo tarehe 6 Agosti, 2024 Mjini Babati wakati akifunga mafunzo ya kuwajengea uwezo Maafisa Tarafa na Watendaji wa Kata Mkoa wa Manyara kwa kuwaasa kuwa wafuatiliji wazuri kwenye michato yote ya ujenzi wa miradi ya maendeleo kwenye maeneo yao.

“kupata mafunzo ilikuwa ni jambo la muhimu, kwa hiyo sasa, tumepata sababu ya kuwawajibisha, tukiona mradi unalegalega kwenye maeneo yenu, basi tutajua sababu ni uvivu wenu, mradi unapokuwa kwenye Kata yako hata kama fedha zimeenda kwa Mkuu wa Shule, Mkuu wa Kituo cha Afya mnafahamu wajibu wenu ninyi kama Viongozi” alisema Mbette. 

Amesema utaratibu wa kuunda kamati za miradi ya maendeleo upo wazi kuanzia mchakato wa manunuzi, utaratibu wa matumizi ya ‘force account’ kuwa wao pia ni wahusika wakubwa wa miradi na hivyo hawana budi kukagua miradi hiyo na kuifuatilia kwa karibu lakini zaidi kuwa taarifa zote za miradi na kama watashindwa kufanya hivyo basi watawajibika kwa kuwa nyenzo tayari wanazo.

Naye Ibrahim Minja Mkurugenzi Msaidizi Idara ya Tawala za Mikoa Ofisi ya Rais TAMISEMI amesema mafunzo hayo ya siku mbili yametolewa na Ofisi ya Rais TAMISEMI kupitia Programu ya Uimarishaji wa Tawala za Mikoa na Serikali za Mitaa (Regions and Local Government Strengthening Programme-RLGSP) kwa kushirikiana na Chuo cha Serikali za Mitaa Hombolo pamoja na Chuo cha Utumishi wa Umma ambapo jumla ya washiriki wapatao 169 kwa mkoa wa Manyara walitarajiwa kupata mafunzo kati yao Maafisa Tarafa 27 na Watendaji wa Kata 142 lakini Afisa Mtendaji wa Kata mmoja na Afisa Tarafa mmoja hawakuweza kushiriki kutokana na dharura zilizowakabili na matarajio ni kuwa watumishi hao watakwenda kuboresha utendaji wao wa kazi kwenye maeneo yao.

Kwa upande wake Happiness Lushole Afisa Mtendaji wa Kata ya Tumati Halmashauri ya Wilaya ya Mbulu amesema hapo awali alikuwa hajui vitu vingi lakini baada ya mafunzo ataweza kutoa huduma bora kwa wananchi kuanzia kwenye ofisi yake na Watendaji wa Vijiji anaowasimamia kama vile kuitisha mikutano kwa wakati, kutoa taarifa za mapato na matumizi kwa wakati na kuhimiza ukusanyaji wa mapato ya Serikali kwenye eneo lake.