LAAC: HATUTAKUBALI SERIKALI IPATE HASARA

Imewekwa tar.: March 21st, 2024

Na. Asila Twaha, Moshi

Kamati ya Kudumu ya Bunge ya Hesabu za Serikali za Mitaa (LAAC) imesema itahakikisha inasimamia ipasavyo matumizi ya fedha za umma zilizopelekwa kutekeleza miradi kwenye maeneo mbalimbali na hawatakubali Serikali ipate hasara.

Kaimu Mwenyekiti wa Kamati ya Bunge ya Hesabu za Serikali za Mitaa (LAAC)  Mhe. Ester Bulaya ameyasema hayo Machi 21, 2024 katika kikao cha majumuisho ya ziara walioifanya Kamati hiyo katika Manispaa ya Moshi, Mkoani Kilimanjaro ya ukaguzi wa jengo la halmashauri, ujenzi wa shule ya sekondari na stendi ya Manispaa ya Moshi.

Ameeleza pamoja na kuonekana kwa  ubora wa ujenzi wa miradi  katika Mkoa wa Kilimanjaro,  Kamati ya  LAAC inajukumu la kufuatilia fedha za Serikali ili zifuate  utaratibu katika matumizi yaliyopangwa  kwa kuzingatia miongozi, taratibu na sheria za Serikali na kutoka Ofisi ya Rais -TAMISEMI.

“Naibu Katibu Mkuu ( Elimu) mtu ambaye amekiuka taratibu  lazima ashughulikiwe nchi hii ni kubwa unapopata fursa ya kusimamia fedha za miradi lazima tusimamie ilete tija kwa wananchi,” amesisitiza Mhe. Bulaya

Akisoma maazimio ya Kamati hiyo, Mjumbe wa LAAC, Mhe. Hawa Mchafu(Mb), amesema Kamati imemtaka Mkurugenzi kuhakikisha kasi ya mradi wa jengo la utawala la Halmashauri hiyo inaongezeka  na kukamilika ndani ya muda wa mkataba   tarehe 28 Machi 2024.

Amesema Kamati imemtaka Mkurugenzi kuhakikisha utekelezaji wa miradi unazingatia sheria, kanuni na taratibu inayotolewa na Serikali ikiwa ni pamoja na kujenga kulingana na michoro illyotolewa na Ofisi ya Rais -TAMISEMI.

Pamoja na maekelezo mengine Kamati pia  imeitaka Ofisi ya Rais -TAMISEMI ichukue hatua kwa watu wote  waliohusika kwa ukiukwaji wa sheria wakati wa kuingia mkataba wa ujenzi wa stendi.

Naye,  Naibu Katibu Mkuu Ofisi ya Rais – TAMISEMI Dkt. Charles Msonde  ameahidi Ofisi ya Rais – TAMISEMI itasimamia kwa karibu  maelekezo yote ya  Kamati iliyoyatoa na yatatekelezwa ikiwamo kuundwa kwa timu ya kufanya tathmini ya ujenzi wa mradi wa stendi ya Manispaa ya Moshi  ili hatua zichukuliwe na wananchi wapate huduma.