KUWENI NA USHIRIKIANO SABABU UTALETA UFANISI KATIKA UTENDAJI WA MAJUKUMU YENU - MWAMBENE

Imewekwa tar.: January 27th, 2025

Na. OR - TAMISEMI,  Singida

Naibu Katibu Mkuu Ofisi ya Rais, Tawala za Mikoa na Serikali za Mitaa anayeshughulikia Elimu Bw. Atupele Mwambene amewataka Makatibu Tawala Wasaidizi wa Mikoa (Elimu) Wakuu wa Divisheni za Elimu ya Awali, Msingi na Sekondari kuwa na ushirikiano wakati wanatekeleza majukumu kwa sababu utaleta ufanisi mzuri katika kazi zao na itasaidia  kutimiza  malengo yaliyowekwa na Serikali yaweze kufikiwa katika sekta   ya elimu.

Ameyasema hayo leo Januari 27, 2025 wakati akifungua kikao Kazi cha Tathmini ya Utekelezaji wa Shughuli za Elimu katika kipindi cha Julai hadi Desemba, 2024 kwa  Makatibu Tawala Wasaidizi wa Mikoa (Elimu) Wakuu wa Divisheni za Elimu ya Awali, Msingi na Sekondari kilichofanyika Mkoani Msingida.

Amesema kukutana kwao kunatoa fursa ya kufanya tafakari ya kina, kujengeana uzoefu, kubadilishana mbinu na kushirikishana katika masuala mbalimbali yanayohusu utendaji kazi na utekelezaji wa maelekezo na shughuli zote za Serikali ndani ya kipindi kifupi na kuboresha malengo ili kuimarisha utekelezaji. 

Mwambene amesema kuwa, Serikali kwa upande wake imefanya jitihada kubwa katika kuimarisha sekta ya elimu hususani katika shule za msingi na sekondari nchini na  amefafanua, baadhi ya mafanikio yake ni kama vile, kuongezeka kwa udahili wa wanafunzi katika ngazi mbalimbali ikiwemo sekondari kufikia 3,087,870 mwaka 2024 na shule za msingi kufikia 11,391,185   mwaka 2024.

Aidha, amewapongeza viongozi hao kwa kusimamia vigezo  walivyowekeana vya kupimana na  utendaji wao mzuri  kwa  kuongeza ufaulu katika mitihani ya kitaifa kwa Darasa la Nne kutoka asilimia 83.3 2023 hadi asilimia 86 mwaka 2024, Darasa la Saba kutoka asilimia 80.58 hadi asilimia 80.87 mwaka 2024,

“Kidato cha Pili kutoka asilimia 85.31 hadi asilimia 85.41 mwaka 2024, na Kidato cha Nne kutoka asilimia 89.36 mwaka 2023 hadi asilimia 92.37 mwaka mwaka 2024’’ amesema

Mwambene ametoa  wito kwa watendaji hao kuendelea   kuyafanyia kazi vizuri na kwa weledi  watakayoyajadili katika kikao hicho kitakachokuwa cha siku tatu ili watakapo rejea kazini kwao  waende  kuwapa ushirikiano na kuwajengea uwezo maafisa waliopo chini yao.

Naye Mkurugenzi, Idara ya Usimamizi wa Elimu, Ofisi ya Rais -TAMISEMI Dkt. Emmanuel Shindika amesisitiza kwa kusema  lengo  la kikao hicho ni kufanya tathmini ya kina ya shughuli za elimu zilizopangwa kwa kipindi cha mwezi Julai hadi Desemba 2024.

Kwa upande wa Katibu Tawala Mkoa wa Singida Dkt. Fatuma Mganga ametoa wito kwa maafisa hao kila mmoja katika eneo lake akabuni mbinu na utaratibu kwa watoto kupata chakula shuleni  chenye kuzingatia lishe bora sababu  amesema ukosefu wa lishe bora unaweza kusababisha sio tu mwili bali hata kuathiri  mtoto uwezo wake darasani.