Kongole DIT- Serikali

Imewekwa tar.: August 22nd, 2021

Na Mwandishi wetu-ARUSHA

Kaimu Katibu Mkuu Ofisi ya Rais, Tawala za Mikoa na Serikali za Mitaa ambaye pia ni Mkurugenzi wa Idara Teknolojia ya Habari na Mawasiliano (TEHAMA), Bw.Erick Kitali  ameipongeza Taasisi ya Teknolojia ya Dar es Salaam (Dar es Salaam Institute Of Technology- DIT) kwaajili ya   mafunzo kwa wataalam wa TEHAMA kutoka Tawala za Mikoa na Mamlaka za Serikali za Mitaa  yatakayowasaidia kutatua changamoto na kuongeza tija kwenye shughuli za kiutendaji za kila siku za katika maeneo yao ya kazi na jamii kwa ujumla

Kitali ametoa pongezi Agosti 21, 2021 wakati akihitimsha mafunzo ya kutengeneza Vinakilishi (photocopier) na Kichapishi (printers) kwa wataalam wa TEHAMA kutoka kwenye Halmashauri nne na Mikoa miwili.

"Nichuke fursa hii kuipongeza DIT kupitia kituo cha Umahiri wa Tehama (ITCOITECT) kwa kuendesha mafunzo haya muhimu yatakayosaidia kutatua changamoto ya muda mrefu yaliyokuwa yakiwakabili maeneo yao ya kazi, ifahamike kuwa unapokuwa na wataalmu wabobezi wa ndani mambo yanafanyika vizuri ndani ya muda mfupi” Alisema Kitali

Kwa upande wake Mkuu wa Taasisi ya Teknolojia Dar es Salaam (DIT) Prof. Preksedis Marco Ndomba, alisema, DIT inatekeleza maagizo ya Serikali ya kuzitaka Taasisi za elimu kutoa suluhisho ya namna ya kuweza kutatua changamoto zilizopo kwenye jamii, hivyo uwepo wa mafunzo hayo ni sehemu ya hatua madhubuti katika kutekeleza maagizo ya Serikali.

Wakizungumza wakati wa kuhitimisha mafuno hayo wanafunzi waliowalionufaika na mafunzo husika akiwepo Bw. Innocent Sigred kutoka Halmashauri ya Mji Kibaha aliushukuru uongozi wa DIT kwa kuendesha  mafunzo  yatakuwa na manufaa kwao na ofisi wanazotoka ambapo yatasaidia kuondoa gharama za utengenezaji wa vifaa..

Mafunzo haya ya utengenezaji vifaa vya ofisi yametolewa kwa siku 14 na kuhudhuriwa na washiriki saba (7) kutoka Halmashauri ya Wilaya ya Makete, Halmashauri ya Mji Kibaha, Halmashauri ya Wilaya ya Meru, Halmashauri ya Manispaa ya Ubungo na ofisi za Wakuu wa Mikoa ya Tanga na Geita.