Jafo Ataka Kasi ya Ujenzi Hospitali ya Gairo Iongezwe

Imewekwa tar.: March 22nd, 2019

Serikali imeuagiza Uongozi wa Halmashauri ya Wilaya ya Gairo kuhakikisha inaongeza kasi ya ujenzi wa hospitali ya wilaya ya Gairo ili kukamilisha kwa wakati kazi hiyo kabla ya tarehe ya mwisho ambayo ni Juni, 30 mwaka huu.

Kauli hiyo ya Serikali imetolewa na Waziri wa Nchi Ofisi ya Rais TAMISEMI, Mhe. Selemani Jafo alipofanya ziara wilayani Gairo kujionea ujenzi wa hospitali ya Gairo na kituo cha afya Gairo na kumtaka Mkurugenzi wa halmashauri na wataalam wake kuongeza kasi ya ujenzi na kuzingatia viwango vya ubora na thamani halisi ya fedha.

“ninyi mpo nyuma mkilinganisha na wenzenu, wenzenu wengine nimekuta wapo mbali ninyi mpo nyuma, hapa kuna suala la maji kuwa yalikuwa hayapatikani lakini nimefurahi kusikia na mashine zimeongezwa, hapa vifaa vya ujenzi viongezwe, nia yangu ni kutaka kuona fedha iliyotumika inafanya kazi iliyokusudiwa na inakamilika kwa wakati, vifaa vyote vije hapa eneo la ujenzi“

Amewataka Wataalam kuzingatia maelekezo ya Serikali na kufanya kazi kama timu moja ili kuimarisha utendaji wao na kazi iliyokusudiwa hali wakizingatia thamani halisi ya fedha na kuepuka kumalizika kwa fedha kabla majengo hayajakamilika.

“Ninyi wataalam kazi yenu kubwa ni kuhakikisha viwango vinavyozingatia ubora na ujenzi vinafanyika, usitake Mhe. Mbunge au Mhe. Mkuu wa Wilaya aje akunyonyeshee kidole kwani ni wajibu wa Watendaji kuhakikisha kazi inakamika, Mkurugenzi hakikisheni kazi hii inakamika”

Aidha, amepongeza ujenzi wa kituo cha afya Gairo ambao umekamilisha majengo yote yaliyotakiwa kujengwa na kwamba ushirikiano wao uliopo uendelee na kuacha malumbano kama ilivyokuwa hapo awali kwani ushirikiano utaimarisha utendaji.

Kwa upande wake Mkuu wa Mkoa wa Morogoro Dkt. Kebwe Stephen Kebwe amesema ujenzi wa hospitali ya wilaya ya Gairo umeefikia asilimia zaidi ya 20 kwa sasa na watahakikisha ujenzi unafanyika usiku na mchana ili kukamilsha kazi kwa wakati kwa ajili ya kutoa huduma za afya mkoani Morogoro.

Dkt. Kebwe amesema Mkoa wa Morogoro ulipokea jumla ya shilingi bilioni 7.6 kwa ajili ya ujenzi wa vituo vya afya, bilioni 4.9 bilioni kwa ajili ya ujenzi wa hospitali za wilaya ambazo ni hospitali ya wilaya ya Gairo, wilaya ya Mvomero na wilaya ya Malinyi.

Naye Mganga Mkuu wa Wilaya ya Gairo Dkt. Dastan Mshana amesema hadi kufikia tarehe 19 Machi mwaka huu jumla ya shilingi 200,471,567 zimekwisha tumika katika hatua za awali za ujenzi wa hospitali hiyo mpya ya wilaya.

Sirial S. Nchembe ameishukuru Serikali kwa kuendelea kutoa fedha na pia amemshukuru Waziri wa Nchi Ofisi ya Rais TAMISEMI kwa kufanya ziara za mara kwa mara na amesema amepokea maagizo ambayo watatekeleza mara moja  kama ilivyoagizwa.

Mbunge wa Gairo Mhe. Ahmed Shabiby amewataka watendaji kufanya kazi kwa kuzingatia thamani halisi ya fedha kama makusudio ya Serikali ya Awamu ya Tano kwani inaitendea haki Ilani ya Chama Cha Mapinduzi, “mimi niwakanye mfanye kazi inavyotakiwa kwa kadiri ya fedha zilizotolewa la sivyo hata mimi nitawabadilikia” ,

Akizungumza kwa niaba ya Chama cha Mapinduzi, Mwenyekiti wa Chama cha Mapinduzi wilaya ya Gairo Bw. Shaban Sagilo amempongeza Mhe Rais Dkt. John Pombe Magufuli na Waziri wa Nchi Ofisi ya Rais TAMISEMI kwa kazi nzuri wanayoifanya na kuahidi kusimamia ujenzi wa hospitali mpaka utakapokamilika.

Aidha, Bw. Sagilo ametoa ombi la kupatiwa Jokofu la kuhifadhia maiti katika kituo cha afya Gairo ili kuwasitiri marehemu kwani ni changamoto ya muda mrefu hasa kwa uharibifu wa miili ya marehemu.

“tulikuwa tunaomba jokofu la kuhifadhia maiti (fridge) kituo cha afya Gairo ingekuwa ni jambo bora zaidi ili wale marehemu wetu waweze kukaa vizuri”

Halmashauri ya wilaya ya Gairo ni moja kati ya Halmashauri 67 ambazo zimepokea fedha kiasi cha shilingi bilioni moja na nusu, ujenzi wake wa awali ni majengo 7 ambayo ni jengo la kuhifadhi dawa, jengo la utawala, jengo la wagonjwa wa nje, maabara, wodi ya wazazi iliyounganishwa na jengo lake la upasuaji, jengo la kufulia, jengo la mionzi (X-ray).

                                  Anaandika Fred Kibano