Kamati za Afya za Msingi zaagizwa kuandaa mikakati ya kukabiliana COVID-19 (CORONA).

Imewekwa tar.: March 16th, 2020

Na. Majid Abdulkarim

Naibu Katibu Mkuu Ofisi ya Rais Tawala za Mikoa na Serikali za Mitaa anayeshughulikia Afya Dkt. Dorothy Gwajima ameziagiza   Kamati za Afya za Msingi za Mikoa  na Halmashauri kuandaa mikakati madhubuti ya kupambana na tishio la ugonjwa wa COVID-19 (CORONA).

Ametoa maagizo hao hivi karibuni  wakati wa ziara yake ya kikazi katika Halmashauri ya Wilayani  ya Chamwino Mkoani Dodoma kwa lengo la kuangalia uelewa wa wananchi kuhusu  tahadhari dhidi ya  ugonjwa wa huo.

Dkt. Gwajima amesema kuwa Kamati za Afya za Msingi za Mikoa na Halmashauri zote nchini  zinatakiwa kuhakikisha  wanaweka mpango kazi ya  namna bora kuwezesha  uhamasishaji wa jamii juu ya mikakati ya kukabiliana na  ugonjwa wa CORONA ambao umekuwa ni tishio.

"Kuna haja ya kila chombo kwenye mamlaka zote kushiriki kikamilifu katika kutoa elimu juu ya ugonjwa huu kwa jamii anayoiongoza na kuhudumia ili jamii na mtu mmoja mmoja waweze kuchukua tahadhari ya ugonjwa huu na kuzuia usiingie nchini” ameelekeza Dkt Gwajima.

 Dkt. Gwajima ameendelea kusisitiza kuwa kila  taasisi, maeneo ya  huduma za jamii na kila kaya kuweka sehemu za kunawia mikono na sabuni ikiwa ni sehemu mojawapo ya tahadhari muhimu na kuachana na tabia  ya kusalimiana  kwa kushikana mikono.

“Ili kufanyikisha kuhamasisha jamii kupata uelewa juu ya ugonjwa huu ni vyema kila kiongozi kutekeleza majukumu yake kwa kutumia takwimu kutathmini ufanisi wa kila mkakati ili kuweza kufikia mafanikio makubwa juu ya uchukuaji wa tahadhari juu ya ugonjwa huu”, amesema Dkt. Gwajima.

Dkt. Gwajima amewataka viongozi katika ngazi zote kuhakikisha  kuwafikia wananchi kwa  kutathmini jinsi gani wanatekeleza maelekezo yanayotolewa na wataalamu.

Awali katika ziara hiyo e Dkt. Gwajima amekagua ujenzi wa Hospitali ya Taifa ya Uhuru inayoendelea  kujengwa  katika Halmashauri ya  Wilaya ya Chamwino na kumuagiza msimamizi wa ujenzi huo Gabriel Mkuele kuhakikisha  wanakamilisha ujenzi kwa wakati licha ya kuwa na  changamoto ya hali ya hewa.

Naye Mganga Mkuu wa Mkoa wa Dodoma Dkt.Best Magoma amesema tayari  Halmashauri  iumeshatenga  maeneo maalum kwa ajili ya  kuwaweka watu watakaobainika kuhitaji uchunguzi zaidi iwapowatabainika kuwa na maambukizi ya virusi vya COVID-

Wakati huohuo wananchi waliyokuwa wakipatiwa huduma katika hospitali ya Mvumi wameiomba Serikali kuhakikisha wanaendelea kutoa elimu kwa  wananchi wote ili kuwajengea uelewa juu ya ugonjwa wa COVID-19(CORONA) ili kila kaya ifahamu vema.

Aidha, Dkt Gwajima amewapongeza wadau wote kwa jinsi wanavyotekeleza kwa kasi kubwa mikakati endelevu ya kuhakikisha wanapambana na kudhibiti  ugonjwa huo ambao ni tishio kwa Taifa.

Ikumbukwe kuwa ugonjwa wa COVID-19 (CORONA) ulianzia katika Taifa la China na mpaka sasa umeenea  katika baadhi ya mataifa japo kwa Tanzania bado haujafika hivyo, kila mtanzania ni wajibu wake kuchukua tahadhari na kujikinga na maambukizi kama wataalamu wanavyo elekeza.