Jafo: Wizi wa mitihani unaporomosha elimu

Imewekwa tar.: September 30th, 2019

WAZIRI wa Nchi, Ofisi ya Rais Tawala za Mikoa na Serikali za Mitaa (OR-TAMISEMI) Mhe. Seleman Jafo amekema tabia ya wizi na udanganyifu wa mitihani na kusema kuwa jambo hilo limekuwa likiporomosha elimu ya Tanzania.

Ameyasema hayo leo wakati wa kufungua Mkutano Mkuu wa kwanza wa Wenyeviti wa Walimu Wakuu wa Shule za Msingi Tanzania Bara kutoka  katika Halmashauri zote nchini uliofanyika katika ukumbi wa Mikutano wa Chuo cha Mipango Jijini Dodoma.

Amesema wizi wa mitihani sio sifa njema kwa Taifa na umekuwa ukiporomosha Taifa katika suala la elimu na kuwaonya walimu kutojihusisha na vitendo vya kushiriki kufanya njama ya udanganyifu.

“ Sio jambo jema kabisa, kuna wanafunzi wanafaulu sana na kuchaguliwa kwenda kwenye shule za vipaji, lakini wakifika huko utashangaa kama kweli alifaulu na hii inatokana na tabia ya wizi na udaganyifu wa mitahani jambo ambalo linarudisha nyuma maendeleo ya elimu nchini.

Mhe. Jafo amesema udanganyifu wakati wa mitihani na wizi wa mitihani, vimekuwa na athari kubwa kwa mtu mmoja mmoja kwa maana ya mwanafunzi, mwalimu, shule na taifa kwa ujumla hivyo ni vyema tabia hii ikafika mwisho.

Amewataka walimu wakuu hao kuhakikisha  wanasimamia kanuni na weledi kwenye masuala ya mitihani ili kuunga mkono juhudu za Serikali za kutaka kutoa elimu bora kwa jamii na kuinua viwango vya ufaulu kwa wanafunzi.

Amewashukuru Baraza la Mitihani nchini  kwa kusimamia nidhamu katika usimamizi wa mitihani kwa sasa jambo ambalo limesaidia kupunguza  wizi wa mitihani ambapo lilikuwa likiigharimu Taifa.

 “Niwasihi nyinyi mliopewa dhamana katika hili, nendeni mkafanye utekelezaji wa suala zima kwa kuzingatia kanuni na kusimamia weledi kwenye usimamizi wa mitihani nchini.”Amesisitiza Mhe. Jafo

Kuhusu kutambua mchango wa walimu wanaofanya vizuri katika mtihani nchini Mhe. Jafo amesema Ofisi ya Rais Tawala za Mikoa na Serikali za Mitaa itatoa tuzo ya ufanyaji vizuri wa mitihani ili kuleta motisha kwa walimu na wanafunzi kuanzia mwaka huu.

Vilevile amesema kuwa uimarishaji wa miundombinu umekuwa ni mkubwa ambapo lengo la Serikali ni kuhakikisha watoto wa kitanzania wanapata fursa ya elimu na kusoma katika mazingira mazuri.

Amesema pamoja na fedha zinazotolewa kwa ajili ya elimu bila malipo, Serikali imetoa zaidi ya Sh bilioni 305.1 kwa ajili ya uboreshaji wa miundombinu ikiwemo ujenzi wa nyumba za walimu, madarasa, matundu vya vyoo, maabara na maboma.

Mhe. Jafo ameendelea kusema kuwa kwa mwaka huu, Serikali imetenga Sh bilioni 288.247 kwa ajili ya elimu bila ya malipo kukiwa na ongezeko la kibajeti ukilinganisha na mwaka uliopita.

 “Ajenda ya elimu kwa sasa inaenda kwa kasi sana, bajeti ya mwaka huu tumetenga sh bilioni 288.247, katika program ya elimu bila malipo na kutoa zaidi ya Sh bilioni 24 kila mwezi, ikiwamo sh bilioni 3.2 ambazo ni kwa ajili ya posho za walimu.

Mhe.Jafo amesisitiza kuwa Serikali itaendelea kuboresha mazingira ya kujifunzia na kufundishia katika shule za kata ili wanafunzi waweze kupata elimu bora.

Wakati huohuo, Mhe Jafo amesema Serikali ilibainisha shule kongwe 89 ambazo zilikuwa katika hali mbaya lakini  mpaka sasa shule 43 tayari zimekabidika kwa  kufanyiwa maboresho huku zilizobaki zikiwa katika hatua mbalimbali za maboresho.

Naye, Mwenyekiti wa Umoja wa Walimu Wakuu wa shule za msingi Tanzania bara(Tapsha), Rehema Ramole, amesema umoja wa waalimu shule za msingi umesikitishwa na baadhi ya walimu ambao wanaojihusisha na udanganyifu kwenye mitihani ya darasa la saba.

“Tunasikitishwa na tabia ya baadhi ya walimu kushiriki kwenye wizi na udanganyifu wa mitihani ya darasa la saba kwa lengo la kutaka kupata ufaulu mzuri, ni vema walimu tukajiepusha na hili.”Amesema Bi. Ramole

Bi. Ramole ameipongeza Serikali kwa kuipa kipaombele sekta ya elimu na kuahidi kuendelea kushikamana bega kwa bega ili kuhakikisha yaliyoahidiwa kwenye Ilani ya Uchaguzi yanatekelezwa.

Aidha ameipongeza Serikali kwa kuwalipa walimu mshahara kwa wakati, kulipa malimbikizo ya posho na madai mbalimbali, sambamba na kulipwa Sh 200,000 kama posho ya madaraka kwa walimu wakuu na kupandishwa madaraja.

Na. Angela Msimbira OR- TAMISEMI