Jafo awakumbusha wasimamizi wa uchaguzi kutangaza maeneo ya Utawala

Imewekwa tar.: September 13th, 2019

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amewakumbusha wasimamizi wa uchaguzi wa Serikali za Mitaa nchini kutangaza na  kubandika kwenye mbao za matangazo  maeneo ya uchaguzi ili kuwawezesha wananchi kutambua  na kufahamu mipaka  ya maeneo yao.

Ameyasema hayo leo ofisini kwake Mtumba, Jijini Dodoma na kuwakumbusha  Wasimamizi wa uchaguzi wa Serikali za Mitaa nchini  kuhakikisha wanatangaza majina  ya maeneo na mipaka ya kila mtaa, kitongoji au kijiji kwa wakazi wa maeneo hayo kwa kuzingatia orodha ya vijiji, vitongoji na mitaa iliyotangazwa katika gazeti la Serikali.

Mhe. Jafo amesema kuwa  Uchaguzi wa Serikali za Mitaa kwa mwaka 2019 utahusisha Mitaa 4263, vijiji 12,319 na vitongoji 64384.

Mhe. Jafo amefafanua kuwa tarehe 9 Septemba, 2019 waliteuliwa  na kutangazwa  wasimamizi wa uchaguzi wa Serikali za Mitaa na kuapishwa mnamo tarehe  12/09/2019 hivyo kwa mujibu wa Kanuni wanaelekezwa kutangaza  majina na mipaka ya vijiji, vitongoji  na mitaa leo tarehe 13 Septemba, 2019.

“Ninawakumbusha Wasimamizi wote wa Uchaguzi wa Serikali za Mitaa kuwa leo tarehe 13/09/2019 ni siku ya  kutangaza  majina na mipaka ya vijiji vitongoji  na mitaa” Amesisistiza Mhe. Jafo

Aidha amewaomba wananchi wote hasa katika mitaa yao  kuhakikisha wanafika katika mbao za matangazo kujionea maeneo   yao ya Utawala kama yatakavyokuwa yamebandikwa na Wasimamizi wa Uchaguzi na kupitia maeneo hayo ndio ambayo Uchaguzi wa Serikali za Mitaa utafanyika.

Na. Angela Msimbira OR-TAMISEMI