Jafo ateta na Wakurugenzi wapya 41

Imewekwa tar.: August 15th, 2018

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amewaagiza Wakurugenzi wapya walioteuliwa hivi karibuni kusimamia nidhamu katika Halmashauri zao.

Ameyasema hayo wakati wa kuapishwa kwa Wakurugenzi wapya wa Mamlaka za Serikali za Mitaa walioteuliwa  hivi karibuni  kwenye ukumbi wa Mikutano REFORM OR-TAMISEMI leo.

Mhe. Jafo amesema mahali popote ambapo kuna maendeleo  lazima nidhamuiwepo hivyo wakurugenzi wanatakiwa kusimamia nidhamu katika Halmashauri zao  ili kutoa huduma sitahiki kwa jamii na kuleta maendeleo katika Halmashauri

‘’Hakunamaendeleo bila kuwa na nidhamu katika utendaji wa kazi kwa kuwa wananchi wanahitaji huduma na huduma haiwezi kupatikana kama watendaji wa Serikali hawatakuwa na nidhamu’’Anasisitiza JAFO.

Amewaagiza Wakurugenzi kuhakikisha watumishi wanatimiza wajibu wao kwa kujua malengo ya Halmashauri zao kwa kufanya kazi kwa weledi  na kutimiza majukumu waliopangiwa kwa wakati ili  kuleta maendeleo.

Amesema kuwa Wakurugenzi wanawajibu mkubwa wa kuhakikisha wanasimamia nidhamu kwenye Halmashauri zao kwa kuwahimiza wafanyekazi kutimiza malengo ya mikakati iliyopangwa katika Ilani ya Chama cha Mapinduzi.

Amewataka kusimamia ukusanyaji wa mapato  kwa kuwaHalmashauri  haiwezi kwenda bila kukusanya mapato hivyo Wakurugenzi wanatakiwa kuweka kipaombele cha ukusanyaji wa mapato na kuhakikisha mapato yanakusanywa.

‘’Haiwezekani hata kidogo Halmashauri inafika hadi mwisho wa mwaka wa fedha mapato aliyoyapata hayafiki asilimia 50,Hivyo hakikisheni mnatumia mifumo ya kielekroniki katika ukusanyaji wa mapato’’.Anasisitiza Jafo

Mhe. Jafo amesisitiza umuhimu wa kubuni vyanzo vipya vyamapato na usimamizi wa matumizi ya mapato hayoili yaendane na utekelezaji wa miradi ya maendeleo katika Halmashauri.

Mhe. Jafo ameziagiza Halmashauri zote nchini kuhakikisha wanajibu Hoja za Mkaguzi Mkuu wa Serikali  kwa wakati na wahakikishe  kila Halmashauri haipati hati chafu.

Katibu Mkuu Ofisi ya Rais Tawala za Mikoa na Serikali za Mitaa Mhandisi Mussa Iyombe amewaagiza  Wakurugenzi walioteuliwa kuitumia nafasi hiyo kikamilifu kwa maslahi ya nchi kwa kutatua kero za wananchi Maskini ili kuleta maendeleo  kwa jamii.

Mhandisi Iyombe amewaagiza Wakurugenzi kusikiliza kero za watumishi wa ngazi za nchini kwa kutatua changamoto zao ili kujenga mahusiano bora katika utendaji kazi katika Halmashauri ili kuleta maendeleo kwa jamii.

“Tatueni kero za wafanyakazi ili kuondoa migogoro katika utendaji kazi wenu na kutengeneza mazingira bora ya kufanyia kazi kwa watumishi” Amesisitiza  Iyombe.

Amesema Mkurugenzi anawajibu wa kusikiliza kero za watumishi kwa haki hivyo  wapange siku ya kusikiliza kero  za watumishi na ili kupata nafasi ya kujua changamoto zao.

Aidha Wakurugenzi wapya 41 wamekula kiapo cha uadilifu  mbele ya Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo na Katibu Mkuu Ofisi ya Rais Tawala za Mikoa na Serikali za Mitaa Mhandisi Mussa Iyombe.

Anaandika Angella Msimbira