Jafo apongeza kasi ya ujenzi wa Hospitali ya Wilaya ya Korogwe

Imewekwa tar.: July 8th, 2020

Na. Angela Msimbira KOROGWE

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo ameridhishwa na kasi ya ujenzi unaoendelea katika Hospitali ya Wilaya ya Korogwe iliyopo katika Kata ya Makuyuni, Halmashauri ya Wilaya ya Korogwe,Mkoani Tanga.

Waziri Jafo ameyasema hayo leo wakati wa ziara yake ya kikazi ya kukagua  miradi ya maendeleo ya ujenzi  wa Hospitali hiyo iliyoanzwa ilianza kujegwa mwezi 4, 2019 na  na tayari  umekamilika  ingawa bado  uwekaji wa miundombinu  ya maji safi na maji taka.

Mhe. Jafo amesema kuwa fedha za ujenzi wa Hospitali hiyo zilitolewa na Serikali mwezi  aprili lakini hadi kufikia sasa kazi imekamilika kwa asilimi 99 tofauti na Halmashauri nyingine ambazo bado hawajakamilisha awamu ya kwanza ya ujenzi.

 “Nimeridhika na kasi ya ujenzi unaoendelea katika Hospitali ya Wilaya ya Korogwe na hasa nimefurahishwa  na utekelezwaji wa maagizo yangu  niliyoyatoa  ya kuongeza  nguvu kazi, sasa naona  kazi imeweza kufanyika  kwa wakati . Hili linaonyesha ushirikiano uliopo kwa viongozi jambo ambalo limesaidia ukamilishaji wa miradi ya maendeleo kwa wakati” ameeleza Waziri Jafo.

Waziri Jafo ameutaka uongozi wa Halmashauri hiyo kuhakikisha wanakamilisha ujenzi wa Hospitali hiyo ili kusogeza huduma za afya karibu na wananchi na kupunguza kero ya kufuata huduma mbali na maeneo yao.

Aidha, Hospitali ya Wilaya ya Korogwe ni moja kati ya Hospitali za Halmashauri za Wilaya 67 zilizojengwa na Serikali kwa ajili ya kusogeza huduma za afya karibu na wananchi.

Naye Mkurugenzi  Mtendaji wa Halmashauri ya Wilaya ya Korogwe Bw. Kwame Daftari amesema kuwa  tayari Serikali imeongeza shilingi milioni 300 kwa ajili  ya kumalizia  ujenzi wa Hospitali hiyo ili huduma za afya ziweze kuanza kutolewa kwa jamii.