Jafo apokea msaada wa vitendea kazi kutoka shirika la John Snow Incorporation (JSI)

Imewekwa tar.: January 23rd, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amelishukuru shirika la John Snow Incorporation (JSI) chini ya mradi  wa Uimarishaji wa Mifumo ya Afya na Ustawi wa Jamii  kwa kutoa vitendea kazi vyenye dhamani ya shilingi bilioni 2.887 kwa ajili ya utekelezaji wa  shughuli za ustawi wa jamii katika ngazi za Malaka za Serikali za Mitaa.

Akitoa shukrani hizo leo wakati wa hafla fupi ya kupokea pikipiki na vifaa vya wasimamizi wa Mashauri ya watoto ngazi ya jamii, iliyofanyika katika Ofisi ya Rais - TAMISEMI zilizoko Mtumba Jijini Dodoma Mhe Jafo amesema vifaa hivyo ni nyenzo muhimu itakayosaidia utoaji wa huduma bora kwa jamii.

Mhe. Jafo amelipongeza shirika hilo kwa  mchango wao mkubwa  katika kuboresha  utekelezaji wa shughuli za Ustawi wa Jamii kwa njia  ya Uimarishaji  wa mifumo  ya utoaji wa huduma za ustawi wa jamii na kuwajengea uwezo,  nguvu kazi  ya ustawi wa jamii ili waweze kutoa huduma  zenye viwango vya ubora na weledi.

Amewataka wanaokabidhiwa vitendea kazi hivyo kuhakikisha wanatumia kwa malengo yaliyokusudiwa, katika kuimarisha mfumo wa uimarishaji wa Ustawi wa Jamii na kuacha tabia ya kuvitumia vitendea kazi hivyo  kinyume  na malengo yaliyokusudiwa na Serikali.

Amefafanua kuwa vitendea kazi hivyo vitatumika na maafisa ustawi wa jamii katika ngazi ya Halmashauri hivyo ninawaagiza kuhakikisha  vinatumiwa kwa ajili ya kazi iliyopangiwa ili kufikia lengo la kutoa huduma bora kwa jamii.

“Nizitake Halmashauri zote zinazopokea vitendea kazi hivi kuhakikisha wanavitumia kwa kazi iliyopangiwa, mfano Pikipiki zisiende kubeba mkaa  wala kugeuzwa kuwa bodaboda au kufanyakazi binafsi bali zikahudumie kuhudumia jamii.” Amesisitiza Mhe. Jafo

Mhe. Jafo amesema vitendea kazi hivi ni kwa ajili ya kuhakikisha mifumo  ya Ustawi wa Jamii inaimarika  na kuwezesha  kutoa huduma  zenye viwango  vya ubora na kwa weledi katika jamii, hivyo hatuna budi kuvitunza na kuvijali.

Aidha amemuagiza Naibu Katibu Mkuu Afay Dkt Dorothy Gwajima kuhakikisha anaimarisha mifumo ya taarifa katika masuala ya ustawi wa jamii  kuanzia katika ngazi za Mamlaka za Serikali za Mitaa ili kuwezesha Wizara kuwa na taarifa sahihi  kuhusu ustawi wa jamii nchini.

Naye Mkurugenzi Mkuu wa Shirika la Shirika la John Snow Incorporation  (JCI)  Dkt. Tulli Tuhuma amesema shirika hilo lipo chini ya ufadhili wa watu wa Merekani  kupitia shirika la Marekani  la Maendeleo la Kimataifa- USAID  ambalo limekuwa likifanyakazi na  Ofisi ya Rais Tawala za Mikoa na Serikali za Mitaa pamoja na Wizara ya Afya, maendeleo ya Jamii, Jinsia  na Watoto.

Dkt. Tuhuma amefafanua amesema kuwa uboreshaji wa Mifumo ya Afya na Ustawi wa Jamii katika ngazi ya jamii unafadhiliwa na  mfuko  wa Dharura wa Rais wa Marekani  ambapo lengo lake kuu ni  kuhakikisha kuwa rasilimali watu  inakuwepo  na  inakuwa na ufanisi mkubwa katika kutoa huduma  za Afya na Ustawi wa Jamii, kwa kuwasaidia  wasichana, watoto  waliokuwa katika mazingira hatarishi , wazee na watu  ambao wanaishi  na virusi vya ukimwi ili kujua hali zao na kuweza kupata matibabu.

Amevitaja  vifaa vilivyokabidhiwa kuwa ni pikipiki 16  zenye dhamani ya shilingi bilioni 2.6  na  makabati  700 yenye dhamani ya shilingi  milioni 287, fulana  7200 , Kofia pamoja na nyenzo  za kukusanyia taarifa  15,800 lengo likiwa ni kutumika  na wafanyakazi  wa Ustawi wa Jamii, , pamoja na  wasimamizi  wa mashauri ya watoto wanaoishi katika mazingira  hatarishi  katika vijiji na mitaa.  

Aidha, Mkurugenzi Mkazi USAID Bi. Kate Somvongsiri amesema kuwa Serikali ya Marekani imedhamiria kuhakikisha kuwa asilimia 90 ya watu wote wanaoishi na Virusi vya Ukimwi wanafahamu hali zao za afya na wanapata tiba na kuwa na VVU iliyofubazwa.