Jafo akerwa na ujenzi wa Hospitali ya wilaya ya Mwanga

Imewekwa tar.: July 8th, 2020

Angela Msimbira   MWANGA

Waziri wa Nchi Ofisi ya Rais Tawala za Serikali za Mitaa Mhe. Selemani Jafo  amemuagiza Mkurugenzi wa Halmashauri ya Wilaya ya Mwanga kuahakikisha wanakamilisha ujenzi wa Hospitali ya Wilaya ya Mwanga  ifikapo tarehe 15 Augusti, 2020

Ametoa agizo hilo leo wakati  akiwa kwenye ziara ya kukagua  miradi ya maendeleo inayotekelezwa  katika Halmashauri ya Wilaya ya Mwanga , Mkoani Kilimanjaro.

Mhe. Jafo anafafanua  Serikali imeetoa fedha kiasi cha shilingi milioni 400 lakini viongozi wa Halmashauri hiyo  wanashindwa kusimamia ujenzi wa Hospitali hiyo ambayo ingewasaidia wananchi maskini , suala hili ni kinyume kabisa na utaratibu..

“Nimekerwa sana na Halmashauri ya Wilaya ya Mwanga , kwa kutokuwa makini katika suala la usimamizi wa miradi ya maendeleo ikiwemo kusuasua kwa ujenzi wa Hospitali ya Wilaya ya Mwanga,” amesisitiza Mhe. Jafo

Amesema kuwa wananchi wanalalamika kuhusu ujenzi wa miundombinu ya afya, lakini bado viongozi wa Halmashauri hiyo wanakosa umakini wa kusimamia ujenzi wa Hospitali hiyo jambo ambalo linarudisha nyuma maendeleo  na juhudi za Serikali za kusogeza huduma za afya kwa jamii

Mhe Jafo amehoji  kuwa kuna Halmashauri ambazo zipo kwenye mazingira  magumu lakini wameweza kukamilisha ujenzi kwa wakati  iweje Halmashauri ya Wilaya ya Mwanga isikamilishe ni niuzembe uliopitiliza.

“Mkurugenzi nakuagiza hadi kufikia tarehe 15/08/2020 hakikisha ujenzi umekamilika, mimi sihitaji watu wazembe katika suala zima la utekelezaji wa majukumu”Amesisitiza Mhe. Jafo

Amesema Wananchi wanahitaji huduma bora za afya na si suala la uzembe wa baadhi ya viongozi ambao hawatimizi majukumu yao waliopatiwa dhamana ya kutoa huduma bora kwa wananchi maskini.

Akitoa taarifa ya maendeleo ya ujenzi wa Hospitali hiyo Mganga Mkuu wa Wilaya  Dkt. Abdul Msuya amesema Serikali ilitoa fedha za ujenzi  Novemba, 2019  ambapo majengo yanayojengwa mpaka sasa ni  jengo la wazazi na jengo la upasuaji.

Awali Mhe. Jafo alikagua ujenzi wa Shule Kongwe  ya Sekondari Same kwa lengo la kukagua  maendeleo ya ukarabati wa miundombinu ya shule hiyo na kuushukuru uongozi wa Halmashauri ya Wilaya ya Same Mkoani Kilimanjaro kwa usiamizi mzuri wa ukarabati wa shule hiyo kongwe.