Jafo aipongeza TAMISEMI QUEENS kupanda ligi daraja la kwanza

Imewekwa tar.: November 1st, 2018

Na Mwandishi wetu, Dodoma

Waziri wa Nchi Ofisi ya Rais Tawala za Mikoa na Serikali za Mitaa Mhe.Selemani Jafo ameipongeza timu ya Netiboli ya Ofisi ya Rais Tawala za Mikoa na Serikali za Mitaa (TAMISEMI QUEENS) kwa kufanikiwa kupanda ligi daraja la kwanza baada ya kuzifunga timu pinzani ikiwemo Jiji la Dodoma katika michuano ya ngazi ya Taifa ya ligi daraja la pili iliyofanyika kuanzia tarehe 20 hadi 26 oktoba, 2018 katika viwanja vya bandari mjini Mtwara.

Akizungumza wakati wa hafla fupi ya kuwapongeza wachezaji na viongozi wa timu hiyo iliyofanyika hivi karibuni katika ukumbi wa Landmark uliopo eneo la Kilimani jijini Dodoma, Mhe.Jafo alisema kuwa yeye kama mwanafamilia ya TAMISEMI anaona fahari kubwa kushuhudia timu hiyo ikipanda ligi daraja la kwanza.

Aliongeza kuwa timu hiyo mbali na kuiletea heshima kubwa ofisi yake kwa kupanda daraja pia ilitoa mfungaji bora wa mashindano hayo ambaye ni  Bibi Flora Odilo kutoka Idara ya Utawala.

Katika mchezo wa fainali, timu ya TAMISEMI QUEENS iliibuka kidedea kwa kuibugiza timu ya Jiji la Dodoma kwa magoli 50 kwa 38.

Jumla ya timu 8 zilishiriki michuano hiyo zikiwemo timu za Magereza na Lindi Queens, Smart na Eagles za jijini Dar es salaam, JKT Makutupora, Jiji la Dodoma, na TAMISEMI QUEENS