Imarisheni mahusiano mazuri kati ya wananchi na Serikali - Makondo

Imewekwa tar.: August 9th, 2024

Na OR TAMISEMI, Ruvuma

Katibu Tawala Mkoa wa Ruvuma Ndugu Mary Makondo amesema Serikali inategemea mahusiano mazuri ya wananchi na Viongozi wa ngazi za msingi ambayo yanatekelezwa pia na Maafisa Tarafa na Watendaji wa Kata.

Kauli hiyo imetolewa leo tarehe 09/08/2024 na Katibu Tawala Mkoa wa Ruvuma Ndugu Mary Gaspar Makondo alipokuwa akifunga mafunzo ya siku mbili kwa Maafisa Tarafa 24 na Watendaji wa Kata 173 wa Mkoa wa Ruvuma katika ukumbi wa Manispaa ya Songea.

Makondo amewataka washiriki hao kuimarisha mahusiano yao na wananchi pamoja na kutatua kero zao ili zisifike ngazi ya juu lakini pia kuchukulia kero zao kama fursa kwani itawasaidia kupata uelewa mpana katika utekelezaji wa majukumu yenu.

Makondo aliwataka washiriki wa mafunzo kuimarisha uhaminifu wakati wa kutoa huduma kwa wananchi, kuzingatia maadili ya utumishi wa umma na kuzingatia usimamizi na taratibu za manunuzi hususani miradi katika maeneo yao.

Naye Mwakilishi wa Katibu Mkuu OR TAMISEMI Ndugu Simon Maganga matarajio ya Ofisi ya Rais TAMISEMI ni kuwa baada ya mafunzo hayo washiriki watakwenda kutumia walichokipata kwenye maeneo yao ya kazi.

Ofisi ya Rais TAMISEMI kupitia Programu ya Uimarishaji wa Tawala za Mikoa na Serikali za Mitaa (Regions and Local Government Strengthening Programme-RLGSP) kwa kushirikiana na Chuo cha Serikali za Mitaa Hombolo pamoja na Chuo cha Utumishi wa Umma kimeendelea kutoa mafunzo haya kwa Maafisa Tarafa na Watendaji wa Kata nchi nzima na tayari Mikoa 22 kati ya Mikoa 26 Tanzania Bara imeshapatiwa mafunzo.