Hospitali 67 za Wilaya Kuongezewa Milioni 500 Baada ya Tathmini

Imewekwa tar.: September 14th, 2019

Serikali imesema itaongeza fedha za ujenzi wa hospitali za Wilaya zipatazo 67 zinazojengwa nchini kote baada ya kufanya tathmini ya kina kubaini sababu za kushindwa kukamilisha hospitali hizo.

Akiongea katika hospitali ya kwanza ya wilaya wakati wa ziara yake ya kikazi Wilayani Longido leo Katibu Mkuu Ofisi ya Rais TAMISEMI Mhandisi Joseph Nyamhanga amesema Ofisi ya Rais TAMISEMI ilikwishatoa mwongozo wa ujenzi kwa kutumia mafundi wazalendo (Local Fundi) au taasisi za kitanzania ambazo zina gharama nafuu lakini pia kutumia sheria za manunuzi ya Umma ili kuepuka hoja za ukaguzi na kuzingatia thamani halisi ya fedha.

Mhandisi Nyamhanga amesema kiasi cha shilingi Bilioni moja na nusu zilizotolewa awali zilikuwa zimalize majengo yote saba lakini pamoja na kuwa sasa zimetengwa shilingi milioni 500 kwa hospitali hizo ili kumalizia baadhi ya gharama zilizoongezeka kutokana na sababu mbalimbali, ofisi yake itafanya tathmini ya kina kujiridhisha na sababu za kutokukamilika kwa baadhi ya hospitali na fedha zote kutumika.

Aidha, amesema kuwa jumla ya hospitali 27 nyingine mpya zinatarajiwa kujengwa katika halmashauri mbalimbali ili kuendelea kuboresha huduma za afya nchini.

Amewataka watendaji kusimamia utoaji wa huduma bora za afya ili ziendane sambamba na ujenzi wa miundombinu ya hospitali zote.

Katibu Tawala Mkoa wa Arusha Bw. Richard Kwitega amesema mkoa wa Arusha umepata fedha za ujenzi wa hospitali 4 za wialya na kwa wilaya ya Longido ni hospitali pekee ya kwanza kujengwa tangu Uhuru.

Kwa upande wake Mganga Mkuu wa Wilaya ya Longido Dkt. Justice Munisi amesema mpaka sasa ujenzi umefikia asilimia 63 kwa majengo yote yaliyokwishajengwa ambayo ni jengo la wagonjwa wan je (OPD), jengo la mionzi, maabara, wodi ya mama na mtoto, bohari ya dawa, jengo la kufulia na wodi ya wazazi.

Wakati huo huo Mhandisi Nyamhanga amekagua kikundi cha akina mama cha Blessings Longido kinachojishughulisha na utengenezaji wa mikate na kimepokea mkopo kutoka Halmashauri ya Wilaya ya Longido shilingi milioni 10 kama ilivyoamriwa kwa halmashauri zote kutenga asilimia 10 ya mapato yao ya ndani ambapo asilimia 4 wanawake, 4 vijana na 2 walemavu. Kikundi kingine alichokitembelea ni Tumaini Osiligi cha walemavu kinachojihusisha na ufugaji wa mbuzi na ununuzi wa mazao.

Pia amekagua ujenzi wa barabara ya kiwango cha lami yenye urefu wa kilomita0.8 kuanzia kituo cha polisi hadi shule ya msingi Longido inayogharimu shilingi 248,770,000 chini ya mkandarasi M/S Meero Contractors Co Ltd ya Jijini Arusha ambayo ujenzi wake umefikia asilimia 98.

Afisa Maendeleo ya Jamii Longido Bi. Grace Mgase amesema kuna jumla ya vikundi 43 ambapo 23 ni vya wanawake na mpaka sasa halmashauri imekwishatoa shilingi 132 milioni zaidi ya lengo lililowekwa la kutoa shilingi milioni 110.

       Anaandika Fred Kibano