DKT. MPANGO AWATAKA VIONGOZI KUONGEZA TIJA KWENYE UKUSANYAJI WA MAPATO

Imewekwa tar.: September 13th, 2022

OR - TAMISEMI, Mbeya

Makamu wa Rais wa Jamhuri ya Muungano wa Tanzania Mhe. Dkt. Philip Isdor Mpango amewataka viongozi wa Serikali za Mitaa kuongeza tija katika ukusanyaji mapato hasa kwa kuwajengea mifumo rafiki ya kieletroniki itakayowezesha kukusanya mapato bila urasimu pamoja na kusimamia matumizi ya mapato hayo.

Dkt. Mpango amesema hayo  katika ufunguzi wa Mkutano Mkuu wa 36 wa Jumuiya ya Tawala za Mikoa na Serikali za Mitaa(ALAT) unaofanyika Jijini Mbeya kuanzia  tarehe 12 hadi 14 Septemba 2022.

Amesema kuwa  viongozi wanapaswa kuhakikisha wananchi wanapata taarifa za mapato na kushirikishwa katika matumizi  ya fedha hizo.

Aidha, Dkt. Mpango amewata Mameya na  Wenyeviti wa Halmashauri kuwa mstari wa mbele katika kusimamia vizuri utekelezaji wa miradi ya maendeleo na matumizi ya fedha za miradi zinazotolewa katika Halmashauri.

Vilevile  amewataka  Madiwani kudhibiti mianya yote  ya upotevu wa mapato na kuhakikisha Sheria na Kanuni za matumizi zinafuatwa pamoja na kusisitiza kuwa thamani ya fedha ionekane katika utekelezaji wa miradi ya maendeleo.

Aidha,  Dkt. Mpango amewataka viongozi hao kusimamia kikamilifu katazo la Serikali kupiga marufuku vifungashio vya plastiki na kuhakikisha oparesheni za mara kawa mara za usafi zinafanyika katika maeneo yote nchini.

“Mamlaka za Serikali za Mitaa zinapaswa kuendelea kutoa elimu kwa wananchi juu ya masuala ya uhifadhi wa mazingira pamoja na kusambaza vyombo vya kutupia takataka katika maeneo yenye mikusanyiko ya watu” Dkt. Mpango

Vilevile Makamu wa Rais ameitaka Wizara  ya  Mazingira kwa kushirikiana na OR-TAMISEMI kufuatilia utekelezaji wa malengo yaliyowekwa katika Serikali za Mitaa ikiwemo upandaji wa  miti milioni 1.5.

Kwa upande wake Naibu Waziri wa Ofisi ya Rais-Tawala za Mikoa na Serikali za Mitaa Dtk. Festo Dugange amesema mkutano huo ni muhimu wa maslahi ya Halmashauri na Taifa kwa ujumla ambapo unalenga kujadili masuala yote muhimu ya msingi yenye maslahi kwa wananchi.