Dkt. Gwajima ataka mabadiliko ya kiutendaji kwa watoa huduma za afya nchini

Imewekwa tar.: March 10th, 2019

Naibu Katibu Mkuu  anayeshughulikia Afya kutoka Ofisi ya Rais Tawala za Mikoa na Serikali za Mitaa Dkt. Dorothy Gwajima ameziagiza kamati za huduma za afya Mkoa (RHMT) na Wilaya(CHMT) kuhakikisha wanasimamia kwa weledi  huduma zinazotolewa katika vituo vya afya nchini.

Ameyasema hayo alipokuwa kwenye ziara ya kikazi ya kukagua utendaji kazi wa vituo vya afya vya Halmashauri ya Wilaya ya Chamwino Jijini Dodoma.

Dkt.Gwajima amesema kuwa ni kazi ya Kamati za kutoa huduma za afya nchini kuhakikisha wanasimamia kwa umakini mkubwa huduma ambazo zinapaswa kutolewa kwa wananachi.

“Serikali imejenga miundombinu ya afya nchini kwa sasa lakini wananchi wanachohitaji ni uhakika wa huduma bora za afya ambazo zinakidhi mahitaji  yao hivyo ni vyema kamati hizo zikahakikisha huduma zinaboreshwa katika vituo vyote vya afya nchini” Amesema Dkt. Gwajima

Dkt Gwajima anaendelea kufafanua kuwa  watoa huduma za afya wote nchini wanatakiwa kutumia taaluma walizonazo katika kuwahudumia wananchi  ili kupunguza malalamiko yanayotolewa katika Sekta ya afya

“Watoa huduma za afya nchini wanapaswa kuhakikisha wanakuwa wazalendo, kuwa na huruma na wagonjwa ili kujenga imani kwa wananchi kuwa huduma za afya zimeboreshwa”Anafafanua Dkt. Gwajima.

Ameendelea kusema kuwa kuwepo kwa miundombinu ni jambo la muhimu sana lakini ifike mahali ambapo sekta ya afya ijitathmini kwa kina kama kweli inatoa huduma stahiki kwa jamii  hasa katika  utendaji kazi, hivyo ni wajibu wa kila mmoja kuhakikisha anatumia weledi katika utoaji wa  huduma za afya kwa wananchi.

Amesema kuwa miundombinu ya vituo vya afya nchini imeboreshwa kwa kiwango kikubwa kinachohitajika ni mabadiliko katika utendaji kazi hasa katika utoaji wa huduma kwa jamii ili vituo vya Serikali visiwe magofu.

 “Ili kuongeza idadi ya wateja katika vituo vya afya nchini  lazima kuwepo na ukarimu ,lugha nzuri kwa mteja ,uwajibikaji bila kusahau uzalendo ambavyo hivi vyote vitaleta  chachu katika matokeo bora kwenye utoaji huduma  za afya  kwa jamii” Ameongezea Dkt.Gwajima

Dkt.Gwajima ameviagiza vituo vyote vya afya nchini kuhakikisha wanakuwa ma mpango kazi ambao utawaongoza na kuwawezesha kufanya tathmini ya kilichofanyika kutafutiwa ufumbuzi ili kufikia malengo waliojiwekea kama kituo.

Aidha amewaagiza kudumisha mahusiano mazuri baina ya watumishi katika ngazi ya Zahanati, Kituo cha afya, Halmashauri, Mkoa na Wizarani kwa kuwa kwa mabadiliko yakifanyika kutaongeza uwajibikaji na utoaji wa huduma  bora utaongezeka.