Dkt. Dugange azitaka Halmashauri kutumia fedha za ujenzi wa vituo vya afya kwa wakati

Imewekwa tar.: December 24th, 2021

Na Fred Kibano, Shinyanga

Serikali imezitaka Halmashauri zote nchini kuhakikisha fedha zinazopelekwa kwenye mamlaka hizo zinafanyiwa kazi iliyokusudiwa na kutumika mapema badala na kuziacha kwenye akaunti kwa muda mrefu au kuhusika kwenye mivutano ya mahali pa ujenzi usio na tija kwa wananchi.

Naibu Waziri Ofisi ya Rais Tawala za Mikoa na Serikali za Mitaa OR-TAMISEMI) Dkt. Festo Dugange ametoa kauli hiyo wakati akikagua kituo cha afya Ihapa Kata ya Old Shinyanga iliyopo katika Manispaa ya Shinyanga.

“nitoe wito kwa Halmashauri nyingine kuchukua hatua mapema za utekelezaji wa miradi hii kwa wakati, kwa sababu kumekuwa na baadhi ya Halmashauri ambazo zinapewa fedha, wananchi wanahamu ya vituo hivi vya huduma, wanapata changamoto ya kufuata huduma za afya mbali lakini wanachelewa sana kuanza utekelezaji na fedha zinakaa muda mrefu kwenye akaunti hali wengine wanavutana tujenge wapi”

Dkt. Dugange amewapongeza Viongozi na Watendaji wa Manispaa ya Shinyanga kwa kazi nzuri ambayo imefanyika katika Kituo cha afya Ihapa Kata ya Old Shinyanga kwa kujenga majengo matatu ya maabara, kichomea taka na wagonjwa wa nje ndani ya miezi miwili tangu kupokea fedha.

“nichukue hatua hii kuwapongeza sana sana kwa hatua hii mliyokwishaifanya, ninyi mlipokea milioni 500 kwa ajili ya ujenzi wa vituo viwili vya afya, lakini mmepokea mwezi wa tisa na sasa tunaongea miezi miwili, mmekwisha paua majengo mpo katika hatua nzuri sana”

Dkt. Dugange amewaasa Viongozi na Watendaji wa Manispaa ya Shinyanga kuanza utaratibu wa kusajili kituo cha afya mapema walau kuanza na huduma za wagonjwa wa nje, kuweka vifaa tiba na kuhamishia baadhi ya watumishi.

kwa upande wake Mkuu wa Wilaya ya Shiyanga Yasinta Mboneka amesema Halmashauri ya Manispaa ya Shinyanga ilipokea kiasi cha shilingi milioni 500 za fedha za Tozo za miamala ya simu kutoka Serikali Kuu kwa ajili ya kujenga vituo viwili vya afya ambapo milioni 250 kituo cha afya Ihapa na milioni 250 nyingine kituo cha afya Sarawe.

Aidha, wananchi walitoa fidia ya eneo kiasi cha shilingi milioni tano na nguvu za kuchimba msingi ya thamani ya shilingi laki nane ili kuharakisha ujenzi wa kituo cha afya Ihapa kwa lengo la kuondoa changamoto ya kupata huduma umbali wa kilometa 15 katika kituo cha afya Kambarage.

Diwani wa Kata ya Old Shinyanga ameahidi kusimamia kazi zote kwa umakini mkubwa na uongozi wote, kuhakikisha thamani ya fedha inaonekana kwenye majengo yote na pia amewaasa wakazi wa maeneo ya Ihapa kuulinda mradi na kuacha kuchukua kitu chochote.

Naye Mtendaji wa Kata ya Old Shinyanga Kayegi Mayalla amesema uteuzi wa eneo la kujenga mradi ulizingatia urahisi wa wananchi wa kata zote tatu kupata huduma za afya na ujenzi wa mradi unakadiriwa kukamilika tarehe 28 Februari 2021 lakini pia hadi kufikia sasa ujenzi huo umegharimu shilingi 111,345,190 na fedha iliyosalia Benki ni shilingi 138,654,810