Dkt. Dugange Aagiza Kukamilika kwa Hospitali ya Wilaya ya Kongwa Kabla ya Desemba 30, 2021

Imewekwa tar.: October 27th, 2021

Na Fred Kibano

Serikali imeagiza kukamilika kwa miundombinu ya hospitali ya Wilaya ya kongwa ifikapo mwezi Desemba 30 mwaka huu ili kuboresha huduma za kijamii

Kauli hiyo imetolewa  hii leo na Dkt. Festo Dugange, Naibu Waziri Ofisi ya Rais TAMISEMI wakati akiongea na watumishi wa Halmashauri hiyo na kasha kukagua hospitali ya Halmashauri ya Kongwa na kituo cha afya Kibaigwa ambapo amesema mpaka sasa zaidi ya shilingi Bilioni 5 zimekwishakutolewa kwa ajili ya ujenzi wa miundombinu mipya na maboresho ya majengo mingine ya muda mrefu katika hospitali ya wilaya ya Kongwa ikiwa ni pamoja na fedha za Uviko 19.

“kwa hiyo nimwelekeze Mkurugenzi (Omary Nkulo) mwende na kasi hii mliyoanza nayo nzuri ili tarehe 30 Desemba majengo haya yawe yamekamilika lakini suala la pili ni kuhakikisha mnazingatia ubora wa majengo”

Aidha Dkt. Dugange amesema fedha zilizotolewa kwa ajili ya Halmashauri hiyo mpaka sasa ni zaidi ya shilingi Bilioni 5 ambazo zinalenga kuboresha huduma za afya wilayani humo.

“Serikali ya Awamu ya Sita inayoongozwa na Mheshimiwa Samia Suluhu Hassan, imeleta fedha nyingi sana za afya katika halmashauri hii ya Kongwa mbali na miradi ya Uviko 19 ambazo ni zaidi ya Bilioni 3 zimeletwa, ambapo wamepokea kwa awamu nne ambapo awamu ya kwanza milioni 400, awamu ya pili milioni 500, awamu ya tatu Bilioni moja”

Dkt. Dugange amesema Halmashauri ya Kongwa imefanya vizuri kwenye miradi ya maendeleo mbali na majengo hayo kulingana na thamani ya fedha lakini pia yamejengwa kwa kuzingatia ubora katika ujenzi wake.

Amesema majengo hayo ni muhimu sana kwa ajili ya kuhudumia wananchi wa Halmashauri ya wilaya ya Kongwa lakini kazi kubwa ni kwa Watendaji hao kuhakikisha majengo hayo yakamilike kwa wakati na ubora unaofaa.