Dar es salaam, Mwanza kucheza fainali UMITASHUMTA

Imewekwa tar.: June 16th, 2021

Na Mathew Kwembe, Mtwara

Timu za soka za wasichana kutoka mikoa ya Dar es salaam na Mwanza ndio zitakazokutana katika hatua ya fainali ya UMITASHUMTA mwaka huu baada ya kufanikiwa kuzitoa katika hatua ya nusu fainali timu  kutoka mikoa ya Tabora na Mara.

Timu ya wasichana ya soka kutoka mkoa wa Dar es salaam ilikuwa ya kwanza kuingia fainali hizo baada ya kufanikiwa kuifunga timu ngumu ya Tabora kwa magoli 3-1, huku Mwanza wakiwafunga majirani zao Mara 1-0.

Kwa upande wa soka maalum  timu ya wavulana kutoka mkoa wa Dar es salaam waliwafunga Kilimanjaro 2-0.

Katika mchezo wa nusu fainali Netiboli Mwanza ilifanikiwa kuifunga Songwe 74-32, huku Mara ikiifunga Kigoma magoli 61-35 hivyo fainali ya Netiboli itawakutanisha miamba Mwanza dhidi ya Kigoma.

Kwa upande wa mpira wa mikono matokeo ya nusu fainali yanaonyesha kuwa timu za wasichana kutoka Mwanza itachuana na Morogoro kwenye hatua ya fainali huku kwa wavulana Tanga itapambana na Mwanza.

Mwanza wavulana iliwafunga Katavi 32-30, huku Tanga wakiwatoa kwenye mashindano hayo Rukwa magoli 27-19, na Mara wasichana waliwafunga Katavi magoli 22-4 huku Morogoro wasichana wakiwafunga Shinyanga magoli 14-9.

Kwa mchezo wa mpira wa goli timu za wavulana Morogoro na Rukwa zitacheza fainali huku kwa wasichana Morogoro atachuana na Tanga.

Rukwa wavulana imeingia fainali ya mpira wa goli kwa kuifunga Dodoma magoli 15-9, na Morogoro wavulana imeifunga Tabora magoli 5-3 huku kwa wasichana Morogoro imeifunga Tabora magoli 12-7 na Tanga wasichana iliifunga Mbeya magoli 8-6.

Nafasi ya mshindi wa tatu kwenye mchezo wa mpira wa goli itazikutanisha Dodoma dhidi ya Tabora kwa wavulana na Tabora dhidi ya Mbeya kwa wasichana.

Matokeo ya mchezo wa nusu fainali kwa mpira wa wavu wavulana Mwanza iliifunga Mara seti 3-0 na timu ya wasichana Mtwara imeifunga Katavi seti 3-0.

Fainali ya UMITSHUMTA inatarajiwa kufikia tamati tarehe 18 juni 2021 ambapo washindi mbalimbali watakabidhiwa zawadi zao na vikombe.