Bil 16.4/- zarejesha hadhi ya Shule za Sekondari za Ufundi nchini

Imewekwa tar.: January 22nd, 2021

Na Atley Kuni, Dodoma

WAZIRI wa Nchi Ofisi ya Rais,Tawala za Mikoa na Serikali za Mitaa (TAMISEMI) Mhe. Selemani Jafo, amesema uwekezaji wa sh. bilioni 16.4 zilizotumika kukarabati shule 9 za ufundi nchini imezifanya shule hizo kurejea katika hadhi yake.

Ameeleza kumalizika kwa kazi hiyo ya kukarabati shule hizo zilizokuwa na miundombinu chakavu kutawezesha wanafunzi wote watakaochaguliwa kujiunga na shule hizo kuhitimu wakiwa na ujuzi uliokusudiwa na Serikali.

Mbali na uwekezaji wa fedha hizo, Serikali pia imeajiri walimu 150 ambao wamepangwa katika shule zote 9 lengo likiwa ni kupata tija iliyokusudiwa kwa Watoto wa kitanzania kuhitimu wakiwa na maarifa yakuweza kujiajiri.

Waziri Jafo, amesema lengo la Serikali ya awamu tano, inayoongozwa na Rais wa Jamhuri ya Muungano wa Tanzania Mhe. Dkt John Pombe Magufuli, ni utekelezaji sera ya Tanzania ya Viwanda iliyo asisiwa mwaka 2016, ambapo amesema wanafunzi hao baada ya kuhitimu elimu zao wataweza kujiajiri katika viwanda vidogo, lakini vile vile kutumika katika viwanda mbalimbali hapa nchini.

“Hatutegemei kuona, wanafunzi wakiwa shuleni wanajifunza nadharia peke yake, tunataka wajifunze pia kwa vitendo ili wawe na ujuzi wakuzalisha baadhi ya vitu wanavyo jifunza mathalani chaki, Vijiti vya kusafisha kinywa ‘toothpick’, kwakutaja baadhi, na kuongeza kuwa,

“katika wakati wa sasa ni vema kufikiria zaidi nje ya boksi, na hasa kwakuwashirikisha baadhi ya wataalam mafundi wa mtaani wenye maarifa ya kutosha katika fani tofauti tofauti ili  kuwaongezea maarifa na ujuzi wanafunzi hao”.

Shule zilizokarabatiwa na ambazo tayari zimesha pangiwa wanafunzi na walimu wa fani mbalimbali ni Bwiru wavula ya mkoani Mwanza iliyo fanyiwa ukarabati kwa gharama ya Zaidi ya sh. Milioni 825, Shule ya Ufundi Chato ya mkoani Geita iliyokarabatiwa kwa gharama ya shilingi bilioni 3.9, Shule ya Ufundi Ifunda ya mkoani Iringa kwa gharama ya shilingi bilioni, 3.6, Shule ya Ufundi Iyunga iliyopo mkoani Mbeya iliyo gharimu shilingi bilioni 1.01 na Moshi Ufundi ya mkoani Kilimanjaro iliyokarabatiwa kwa shillingi bilioni 2.1.

Shule zingine ni Shule ya Ufundi Mtwara, kwa gharama ya bilioni, 1.3 Musoma ufundi ya mkoani Mara, kwa gharama ya shilingi bilioni 1.2 Mwadui ya mkoani Shinyanga, iliyo pokea milioni sh. Milioni 226 kwa ajili ya ukarabati na Shule ya Ufundi Tanga ya mkoani Tanga, iliyo gharimu shilingi, bilioni 2.1 ambapo gharama yake kuu ni sh. bilioni 16,4.

Wakiongea kwa njia ya Mkutano kwa masafa ‘Video Conferences’ wakuu wa mikoa hiyo pamoja na wataalamu walioshiriki kikao hicho, kutoka katika Mikoa hiyo tisa, waliiomba Serikali kuhakikisha inaboresha Mitaala ili iweze kukidhi mahitaji ya sasa, ambapo Waziri Jafo, akitolea ufafanuzi alisema, anaipongeza Wizara ya Elimu kwa kazi kubwa ya maboresho ya Mitaala lakini akautaka uongozi wa Elimu TAMISEMI, kulichukua jambo hilo na kulifanyia kazi kama ilivyo shauri.

Akihitimisha kikao hicho, Waziri Jafo, amewaelekeza Wakuu wa Mikoa kuwa walezi wakuu shule hizo, kwakuzitembelea na kujua changamoto wanazokabiliana nazo lakini pia kuzitafutia ufumbuzi wa kudumu.

Katika hatua nyingine, Waziri jafo ametumia wasaa huo, kuwagiza Wakurugenzi kuhakikisha wanawalipa fedha za kujikimu watumishi wote waliopangiwa kazi katika maeneo yao ndani ya siku saba.