Ajenda Upimaji maeneo ya Shule sasa basi-Serikali

Imewekwa tar.: December 21st, 2020

Serikali imesema ajenda kuu katika mwaka wa 2021 ni upimaji wa maeneo yote ya shule na kuyapatia hati miliki ili kuepusha migogoro na migongano ya mara kwa mara baina ya jamii na uongozi wa shule.

Akifungua Mkutano wa Mkuu wa 15 Umoja wa Wakuu wa Shule za Sekondari nchini (TAHOSSA), Waziri wa Nchi Ofisi ya Rais-TAMISEMI, Mhe. Selemani Jafo amesema, amesiki kilio na malalamiko ya umoja huo juu ya maeneo mengi ya Viwanja vya shule kutopimwa na kufanya wananchi kuvamia bila utaratibu, hivyo ajenda kuu katika mwaka wa 2021 ni kuhakikisha maeneo yote yanapimwa na kumilikishwa kwa taasisi hizo za serikali.

“Nawaagiza Wakurugenzi wote nchini, hili suala la upimaji sasa lifikie mwisho, leo ni tarehe 21 Desemba, 2020 ifikapo mwakani tarehe kama ya leo suala hili tusingependa kulisikia tena, kama ni wataalam wa ardhi wapo kila Halmashauri hivyo basi Wakurugenzi wawasimamie ili kukamilisha zoezi hili muhimu” amesema Mhe. Jafo

Katika hatua nyingine Mhe. Jafo amesema, Serikali inayo nia ya dhati yakuhakikisha Watoto wa kitanzania wanapata elimu bora kwakuwaboreshea mazingira bora ya kujifunza na kusomea, kwani kila mwezi fedha zinazo tolewa  kwaajili ya elimu bila malipo zimefikia bilioni 24, ametaja kuwa hayo ni mafanikia makubwa, huku akisema serikali pia imetenga  bilioni 68 kwenye bajeti katika mwaka wa fedha   2020/21, kwa ajili ya ujenzi wa vyumba vya madarasa 2,088 kwa shule za Msingi na shilingi 103,984,000 kwa ajili ya umaliziaji wa vyumba vya maabara vilivyojengwa kwa nguvu za wananchi.

Waziri Jafo amewahakikishiwa wajumbe hao kuwa, ifikapo Juni, 2021, shule zote Kongwe 89 zinazokarabatiwa zitakuwa zimekamilika na kuonekana mpya na kwamba, hadi sasa kuna jumla ya shule 73 zilizokwisha kukamilika na ukarabati unaendelea kwenye shule 13 kati ya 16 ambazo nazo zitakarabatiwa kulingana na ratiba ya kazi hiyo. “Lengo letu ni kuimarisha mazingira ya kufundisha na kujifunzia amesisitiza Waziri Jafo.

Akitoa salaam za Katibu Mkuu, Ofisi ya Rais-TAMISEMI, Naibu Katibu Mkuu anayeshughulikia elimu, Gerald Mweli alisema, Serikali imefanya mapinduzi Makubwa katika sekta ya elimu ikiwepo matumizi ya TEHAMA.

“Kwa sasa unaweza kukaa Ofini kwako na ukapata idadi ya kamili ya wanafunzi kupitia mfumo wa (School Information System-SIS) kwakuwa ni mfumo unao kusanya takwimu za kila siku na kuzichakata kwa ajili ya matumizi”.  Amesema Mweli na kuongeza kuwa ili Shule iweze kupata Fedha  PREM ni lazima uwekaji na utunzwaji wa takwimu kupitia mfumo huo ziwe madhubuti.

Awali akitoa salamu za Umoja huo Rais wa TAHOSSA Taifa, Frank Yesaya alimkumpongeza Rais wa Jamhuri ya Muungano wa Tanzania, kwa ushindi wa kishindo wa asilimia 84 huku akiahidi kwa niaba ya Umoja huo, kuendelea kuunga mkono juhudi za Serikali zakumkomboa mtoto wa kitanzania kwa kumpatia elimu iliyo bora.

“Mhe. Waziri tukuhakikishie kwamba, Umoja huu upo tayari kushikiana na Serikali wkati wote na salam hizi tunaomba zimfikie Mhe. Rais, mwambie tunaunga mkono juhudi za Serikali chini ya uongozi wake, kwakuwa ni Rais mwenye maono na moyo wa kizalendo kwa nchi yake” amesema Rais wa TAHOSSA.

Mkutano Mkuu wa Umoja wa Wakuu wa Shule za Sekondari Tanzania, ambao ni Mkutano wa 15, umefanyika jijini Dodoma ukiwa na kauli mbiu,Elimu bora kwa uimarishaji wa uchumi wa kati

Na Atley Kuni-TAMISEMI, Dodoma