Zingatieni Sheria, Kanuni na Miongozo Kuepuka Migogoro – Mhe. Makilagi

Imewekwa tar.: May 4th, 2023

Na Fred Kibano, Mwanza

Serikali imewaasa Wahandisi na Maafisa Manunuzi waliopata mafunzo ya usimamizi wa manunuzi ya vifaa na ujenzi wa shule za Mradi wa BOOST kufuata sheria ili kufikia malengo na kuepuka migogoro.

Akifunga mafunzo hayo ya siku mbili Jijini Mwanza hivi leo tarehe 04.05.2023, Mkuu wa Wilaya ya Nyamagana Mheshimiwa Amina Makilagi ambaye alitoa hotuba kwa niaba ya Mkuu wa Mkoa wa Mwanza Mheshimiwa Adam Ally Malima amewaasa Maafisa hao kuzingatia Sheria, Kanuni na Miongozo ili kutekeleza miradi yenye tija, kwa wakati na kuepuka migogoro.

“Ofisi ya Rais TAMISEMI inaamini weledi mlio nao katika kusimamia miradi, naomba niwakumbushe kutekeleza uzingatiaji wa Sheria, Kanuni na Miongozo ili kupata thamani ya fedha na kuepuka hoja za ukaguzi. Sheria hizo ni pamoja na Sheria ya Usimamizi wa Fedha za Umma, Sheria za Manunuzi, Sheria ya Fedha za Serikali za Mitaa, na Sheria ya Bajeti” amesema Mheshimiwa Makilagi.

Aidha, amewaasa kuimarishaji ushirikiano ngazi ya Halmashauri ili Kila mmoja atimize majukumu yake kwa kushirikiana na wenzake na pia utekelezaji wa ujenzi wa miundombinu kwa wakati na kwa ubora lakini pia kuepuka migogoro ambayo huchangia kuchelewesha utekelezaji wa miradi.

Pia Mhe. Makilagi amewaasa Maafisa hao kuendesha mafunzo waliyoyapata kwa Maafisa Elimu Kata na Walimu Wakuu wa Shule zitakazotekeleza miradi ya ujenzi kupitia mradi wa BOOST, kutobadilisha maeneo/shule zitakazopangiwa ujenzi/ukarabati wa miundombinu kwani Ofisi ya Rais TAMISEMI ilishafanya tathmini ya ujenzi wa shule na ukarabati wa miundombinu chakavu hivyo kusiwepo na ubadilishaji wa maeneo.

Amesema Serikali imeamua kuendesha mafunzo hayo ili kuwezesha kuandaa taratibu sahihi za  ujenzi wa shule mpya na ujenzi wa vyumba vya madarasa katika shule zenye upungufu wa miundombinu hiyo ili kuwawezesha kupata uelewa wa pamoja kuhusu masuala yote ya kuzingatia kabla na wakati wa ujenzi wa miundombinu ya shule lengo kuu likiwa kutimiza masharti na vigezo vyote vilivyowekwa. 

Kwa upande wake Bwana joel Mhoja Mratibu Msaidizi Mradi wa BOOST amemshukuru Mheshimiwa Amina Makilagi na kuahidi kuyatekeleza yote yaliyofundishwa ikiwa ni pamoja na usimamizi wa mchakato mzima wa Mradi wa BOOST.

Serikali ya Awamu ya Sita ya Mheshimiwa Rais Dkt. Samia Suluhu Hassan imetoa jumla ya shilingi Bilioni 230 kwa ajili ya ujenzi wa miundombinu kwenye shule 1,338 za msingi zilizopo katika Mikoa na Halmashauri zote nchini ili kujenga shule mpya 302 zenye vyumba 3,276 vya madarasa, madarasa 604 ya Awali ya mfano, majengo ya utawala 302 na matundu ya vyoo 6,160

Mafunzo hayo ya kuwajengea uwezo Maafisa Manunuzi na Wahandisi yanahusu juu ya usalama wa mazingira, ramani za mpangilio wa majengo na mapitio yake, tafsiri rasmi ya taratibu za manunuzi, utunzaji wa kumbukumbu za manunuzi na utambulisho wa DLI na vigezo vya uhakiki kwenye Mradi wa BOOST.