Wekezeni ujenzi wa miundombinu ya madarasa

Imewekwa tar.: September 2nd, 2021

Waziri wa Nchi Ofisi ya Rais Tawala za Mikoa na Serikali za Mitaa Mhe. Ummy Mwalimu amewaomba wadau mbalimbali nchini kuhakikisha wanawekeza katika sekta ya Elimu kwa kujenga  miundombinu ya madarasa  ili kupunguza  uhaba wa  madarasa nchini.

Akiongea katika Maadhimisho ya miaka 40 ya shirika lisilo la kiserikali Word Vision Tanzania yaliyofanyika kitaifa leo Mkoani Dodoma  katika Ukumbi wa Mkuu wa Mkoa Jijini Dodoma Waziri Ummy amesema kuwa elimu ni kipaombele cha Serikali lakini bado kuna upungufu wa madarasa katika shule zetu za Msingi na Sekondari, upungufu wa waalimu na madawati.

Amesema kuwa takwimu zinaonesha kuwa katika mwaka 2021 wanafunzi wa darasa la saba ni 1,129,129, ambapo mwaka jana ufaulu ulikuwa 82.6 na Serikali inategemea mwaka 2022 ufaulu utaongezeka hadi 83.6 hivyo wanafunzi takribani 944, 855 wanatarajiwa kufaulu na kuanza Kidato cha Kwanza Januari, 2022.

Ameendelea kusema kuwa changamoto iliopo ni kuwa wanafunzi wanaotegemea kumaliza Kidato cha Nne mwaka 2021 ni 422,409 hivyo kuna ongezeko la wanafunzi  522,446 ambao hawatakuwa na vyumba vya madarasa.

Aidha kutoka katika Tozo ya miamala ya mawasiliano tutapokea Shilingi Bil 7 ambazo zitakwenda kujengwa vyumba vya madarasa 560 lakini pia bado tutahitaji vyumba zaidi kwa ajili ya watoto wetu ni vyema wadau wakawekeza katika eneo hilo ili kuunga mkono juhudi za Serikali katika kutoa elimu bora.

Amewataka wadau kuunga mkono juhudi za Serikali  katika kuhakikisha inaboresha miundombinu ya Elimu nchini hasa kwenye ujenzi wa madarasa ya shile za Sekondari kwa lengo la kuhakikisha wanafunzi wanaomaliza darasa la saba  na kuwa na sifa wanajiunga na kidato cha kwanza.

Aidha, Amewataka Wakuu wa Mikoa wote nchini  kuhakikisha wanajenga madarasa hayo kwa wakati na kuacha kujenga  kwa  kuzima moto kusubiri hadi mwisho wa mwaka  ndipo  kuanza kujenga kwa kuwa  idadi ya wanafunzi wanaotegemewa kuanza Kidato cha Kwanza inajulikana hivyo wajiandae mapema.

Aidha amesema kuwa kwa mwaka 2022 hakutakuwa na uchaguzi wa wanafunzi awamu ya pili (Second Selection) kwa kuwa Serikali inataka kuona  watoto wote wanaofaulu kujiunga na Kidato cha Kwanza  wanapata nafasi kwa wakati mmoja.