Waziri Jafo awapa Rungu Takukuru mkoani Mwanza

Imewekwa tar.: January 6th, 2021

Na Atley Kuni, Sengerema, MWANZA

WAZIRI wa Nchi Ofisi ya Rais, Tawala za Mikoa na Serikali za Mitaa, Mhe. Selemani Jafo amemuagiza uongozi wa TAKUKURU mkoani wa Mwanza, kushughulia suala la utata wa ukubwa wa eneo na gharama za ujenzi wa hospitali ya wilaya ya Sengerema, mkoani Mwanza.

Pia ameutaka kuchunguza suala la ubadhilifu wa mashine za kieletroniki (POS) sambamba na mkanganyiko wa ucheleweshaji wa fidia kwenye eneo la stendi ya magari katika Halmashauri ya Sengerema.

Waziri Jafo amefikia kutoa uamuzi huo mara baada ya Mbunge wa Jimbo la Sengerema Hamis Tabasam kuibuka na kusema taarifa aliyowasilishwa kwake ilikuwa ya uongo.

Tabasam alibainisha mbele ya Waziri Jafo kuwa ukubwa halisi wa eneo la hospitali ni ekari 53, ili hali katika taarifa aliyosomewa Mhe. Waziri ikionesha kuwa ni ekari ekari 41.

Mbali ya utata juu ya ukubwa wa eneo la hospitali, katika eneo hilohilo la Hospitali, likaibuka sakata la mkanganyiko wa malighafi zilizotumika katika jengo hilo, na ubora wa jengo, hali iliyomsukuma Waziri Jafo kuingia kazini kwa kufanya baadhi ya vipimo kwa ajili yakujiridhisha na ubora wa jengo husika.

Suala lingine lililoibuka ni juu ya eneo la stendi ya magari, ambapo kwa mujibu Tabasam eneo hilo lilikuwa lilipiwe fidia ya Sh milioni 33, lakini kwa mshangao mkubwa fidia inayo daiwa kwa sasa imefikia Sh milioni 68.

Kutokana na tofauti ya maelezo, Waziri Jafo alisema: “ kutokana na tofauti zilizopo ni wazi kwamba wilaya hii inashida hivyo uongozi wa TAKUKURU Mkoa wa Mwanza lichunguzeni hili.”

Wakati Waziri Jafo akiendelea na ziara, yaliibuka madai ya matumizi yasiyo sahihi ya mashine za kukusanya mapato (POSS).

Ilielezwa mbele ya Mhe. Waziri Jafo kwamba, wapo watu wanaofuja fedha za umma kwa kutowasilisha fedha wanazo kusanya na hivyo kuishia mikononi mwa watu wachache wasio kuwa waaminifu, ambapo ilibainika jumla ya watumishi 10 wanahusika na sakata hilo.

 “Mheshimiwa Mkuu wa Mkoa (John Mongella) wilaya yako ya Sengerema inamatatizo, kwa mkanganyiko huu ni wazi kwamba hapa Sengerema kuna shida, hivyo nauagiza uongozi wa TAKUKURU, mkoani Mwanza, uje hapa uchunguze katika maeneo yote ambayo yameonekana kuwa na shida na hatua stahiki zifuate kwa wahusika.”

Waziri Jafo yupo katika ziara ya kikazi katika Mikoa ya Mwanza, Simiyu, Geita na Kagera, kwa lengo la kukagua shughuli mbali mbali za wananchi lakini pia kuzungumza na watumishi pamoja na wananchi kwenye maeneo hayo.