Watumishi waaswa kuwa Waadilifu na Weledi kazini

Imewekwa tar.: September 7th, 2021

Na Fred Kibano na Mathew Kwembe Kilosa,

Katibu Mkuu Ofisi ya Rais TAMISEMI Prof. Riziki Shemdoe amewaasa watumishi katika Halmashauri ya Wilaya ya kilosa kufanya kazi kwa weledi na kuwa waadilifu wanapokuwa wakiwahudumia wananchi katika ngazi mbalimbali.

Hayo yamesemwa na Katibu Mkuu Ofisi ya Rais TAMISEMI prof. Riziki Shemdoe alipofanya ziara yake ya kikazi wilayani Kilosa hapo jana ambapo amewataka watumishi wa kada mbalimbali aliopata fursa ya kuongea nao kuwa waadilifu kwani wananchi wanawategemea sana watumishi kuwatumikia kwa maadili na weledi katika kazi zao ili kuwaletea maendeleo.

“tumekuja hapa kujadiliana mambo kadhaa ya kiutumishi tufahamu kwamba idadi kubwa ya watumishi wapo Ofisi ya Rais TAMISEMI na ukiangalia hapa tulivyo sisi ndio watumishi ambao wananchi wenzetu wanatutegemea sana, utendaji wetu sisi  utendaji wetu sisi ndio unaofanya  maendeleo yaweze kupatikana kwa hiyo utumishi wa Umma unataka kuwa mwadilifu, ukishakuwa mwadilifu hata mtu unaye muhudumia atafurahia huduma ya kwako”

Amewaasa watendaji hao kuwa waadilifu na kudumisha nidhamu kazini kwa kuwa hata wanapoonekana machoni pa wananchi waonekane waadilifu ikihusisha mavazi wanayovaa na ongea yao wanapowahudumia wananchi kwani watumishi ni mikono ya Viongozi na bila wao Viongozi hawawezi kuonekana wanafanya kazi.

Prof. Shemdoe ametoa kwa Halmashauri ya Kilosa kwa asilimia 84 ya makusanyo yao ya ndani lakini amesisitiza kuwa kazi hiyo itakuwa yenye manufaa endapo asilimia 44 ya makusanyo yote itapelekwa kwenye maendeleo yanayoleta tija kwa wananchi kam vile ujenzi wa shule, vyoo, vituo vya afya, miundombinu mingine na huduma za kijamii kwa wananchi.

Amewaasa pia watendaji wa Halmashauri ya kilosa kuopngeza wigo wa ukusanyaji wa mapato mwaka huu wa fedha2021/2021 kwa kufikia asilimia 100 ambayo ni shilingi bilioni 4 na pia kupeleka asilimia 44 kwenye miradi ya mandeleo na huduma za kijamii.

Kwa upande wake Katibu Tawala Mkoa wa Morogoro Bi. Mariam Ntunguja alimshukuru mgeni rasmi Katibu Mkuu Ofisi ya Rais TAMISEMI Prof. Riziki Shemdoe kwa kufanya ziara yake yenye tija wilayani humo lakini ameahidi kusimamia ujenzi wa miradi ya elimu iliyopata fedha kutoka Serikali Kuu ikiwa ni pamoja na fedha za mradi wa Lipa Kulingana na Matokeo (EPR) na ile ya ujenzi wa vituo vinne vya afya.

Naye Mkurugenzi wa Halmashauri ya wilaya Kilosa Bw. Kisena Mabuba akiwasilisha taarifa yake kwa mgeni rasmi amesema mpaka sasa jumla ya shilingi milioni 369,712,046 zimetolewa kama sehemu ya asilimia 10 kwa ajili ya wanawake, vijana na watu wenye ulemavu.