Watendaji msikae ofisini mkamilishe madarasa – Dkt. Dugange

Imewekwa tar.: December 21st, 2021

Na Fred Kibano, Mara

Serikali imewataka watendaji mkoani Mara kuhamia maeneo ambayo miradi ya ujenzi wa miundominu ya elimu inajengwa ili kuhakikisha miradi hiyo inakamilika kabla ya tarehe 30 Desemba, 2021.

Kauli hiyo ya Serikali imetolewa na Dkt. Festo Dugange Naibu Waziri Ofisi ya Rais TAMISEMI wakati akifanya kikao cha pamoja na Sekretarieti ya Mkoa wa Mara na baadhi ya watendaji wa Manispaa ya Musoma katika ukumbi wa Ofisi ya Mkuu wa Mkoa uliopo Manispaa ya Musoma mkoani Mara mapema hivi leo.

“sisi kama Watendaji, tunayo kazi kubwa sana ya kusimamia hii miradi kupitia fedha hizi ambazo Serikali imezileta lakini kuhakikisha miradi yote na shughuli zote zinatekelezwa ipasavyo, kama miradi kukamilika kwa wakati, inayo ubora lakini pia inaendana na thamani ya fedha kulingana na miradi husika”  

Dkt. Dugange amesema lengo la Serikali ya Mhe. Rais Samia Suluhu Hassan kwenye miradi ya ujenzi wa madarasa ya shule za sekondari yapatayo 12,000 na yale ya shule shikizi za msingi yapatayo 3,000 nchini yanatakiwa yawe yamekamilika kwa asilimia 100 ifikapo Desemba 30, 2021 ili wanafunzi waweze kusoma bila kusubiria awamu za kwanza au ya pili kwa shule za sekondari kwani Serikali imefuta machaguo yanayofuata.

Amesema mkoa wa Mara umefikia asilimia 68 ya ujenzi wa madarasa na hivyo watendaji wanatakiwa kushinda maeneo ya kazi ili kusimamia kazi zinazofanyika ili zimalizike kwa wakati na kwa ubora na thamani halisi.

Kwa upande wake Katibu Tawala Mkoa wa Mara Bw. Albert Msovela amesema mkoa wa Mara ulipangiwa kujenga madarasa 708 kati ya hayo 618 ni ya shule za sekondari na madarasa 90 ni ya shule za msingi kwenye vituo shikizi.

Aidha, Bwana Msovela amesema mkoa ulipokea kiasi cha shilingi Bilioni 15 na milioni 780 kutekeleza ujenzi huo na mpaka sasa wamefikia asilimia 68 ya ujenzi wote kimkoa kutokana na changamoto mbalimbali kwa baadhi ya halmashauri kupata changamoto kadhaa lakini wamejipanga kukamilisha ujenzi huo katika muda uliowekwa na Serikali ikiwa ni pamoja na kukabidhi mradi Serikalini.

Naye Mwakilishi wa Mkuu wa Mkoa wa Mara ambaye ni Mkuu wa Wilaya ya Musoma Dkt. Halfan Haule amesema changamoto kadhaa zilizojitokeza kwa Halmashauri kama upatikanaji wa saruji, vifaa kama mabati na bei ya bidhaa nyingine za ujenzi ambazo zimesababisha kuchelewa kwa miradi ya elimu lakini wamejipanga kukabidhi miradi hiyo tarehe 30 Desemba, 2021 kama iliyopangwa na Serikali.