Watanzania waishio Marekani wachangia vifaa tiba vya thamani ya sh.milioni 15

Imewekwa tar.: April 21st, 2021

Na Atley Kuni, TAMISEMI

Watanzania waishio nchini Marekani wametoa msaada wa vifaa tiba vyenye thamani ya zaidi ya sh. milioni 15 kwa mikoa 11 ya Tanzania bara, ikiwa ni mchango wao katika kutathamini juhudi za serikali katika kuimarisha afya za watanzania.

Vifaa hivyo vitagawiwa katika Mikoa ya Dar-es Salaam, Dodoma, Kigoma, Kagera, Kilimanjaro, Arusha, Tanga, Ruvuma, Mbeya, Lindi na Njombe.

Akipokea msaada huo wa vifaa tiba ambavyo vinatumika kupima kiasi cha Oxygen  mwilini  mwa mwanadamu, Naibu Waziri Ofisi ya Rais TAMISEMI anayeshughulikia afya, Dkt. Festo Dugange amewapongeza watanzania hao kwa kuthamini juhudi za serikali za kujenga na kukarabati miundombinu mbalimbali ya afya nchini.

 Ili kuhakikisha kuwa jukumu hilo linatekelezwa kikamilifu, Naibu Waziri ameongeza kuwa katika bajeti ya mwaka 2021/22 serikali imetenga shilingi bilioni 12.3 kwa ajili ya kununulia dawa na vifaa tiba.

“Serikali imefanya kazi kubwa ya ujenzi wa Miundombinu na katika mwaka wa fedha 2021/22 tumeweka kwenye bajeti ya dawa na vifaa tiba kama hivi na vingine kiasi kinachofikia Bil.12.3, hivyo kwa jitihada hizi za wadau hawa na wengine wote watakao kuja hapo baadaye ni ishara kwamba lengo letu la kuweka vitendanishi na dawa litatimia,” amesema Dkt. Dugange.

Akiongea kwa niaba ya watanzania waishio nchini Marekani, rais wa chama hicho, Dkt. Frank Minja, amesema, wanaona fahari ya kuchangia vifaa hivyo ambavyo vitakwenda kugawiwa kwenye ngazi ya Hospitali za Wilaya na kutumika na watanzania wenzao.

Naye Mbunge wa Viti Maalum, kupitia Chama Cha Mapinduzi Mhe. Neema Lugangira, ambaye amekuwa akishikirikiana na wadau hao, amesema hizo ni hatua za awali za kuwashirikisha watanzania mbalimbali kusaidia sekta ya afya lakini shabaha yake ni kuhakikisha kuwa wadau wengi zaidi wanapatikana kuchangia juhudi hizo.

“Sisi tunamshukuru sana Waziri wa Nchi Mhe. Ummy Mwalimu, kuridhia kupokelewa kwa msaada huu, ambao umepokelewa na Naibu Waziri, Dkt. Festo Dugange, mimi kama mbunge nitaendeleza jitihada hizi kwa niaba ya Serikali ili lengo la kuimarisha afya ya mtanzania iweze kutimia,” amesema Lugangira.

Naye Naibu Katibu Mkuu Ofisi ya Rais TAMISEMI anayeshughulikia Afya Dkt. Grace Magembe, amesema kuwa atahakikisha kuwa vifaa vilivyopokelewa vinatunzwa ili viweze kudumu kwa muda mrefu.

Hafla ya kukabidhi vifaa tiba ilifanyika makao makuu ya Ofisi ya Rais TAMISEMI jijini Dodoma na kuhudhuriwa pia na Mkurugenzi wa huduma za afya, lishe na ustawi wa jamii kutoka Ofisi ya Rais TAMISEMI Dkt. Ntuli Kapologwe  na Katibu Mtendaji wa Tume ya Utumishi wa Walimu Paulina Mkwama.