Wakuu wa Mikoa watakiwa kuongeza kasi katika kusimamia ukusanyaji mapato

Imewekwa tar.: March 16th, 2021

Na Atley Kuni, DODOMA

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amewataka Wakuu wa Mikoa kuhakikisha, wanaongeza kasi katika kuwasimamia watendaji walio chini yao ili waweze kukusanya mapato ya kutosha kwa ajili ya kutekeleza miradi mbalimbali ya maendeleo na kuongeza uwezo wa kutoa huduma za jamii katika maeneo yao.

Akifunga kikao kilicho wakutanisha Wakuu wa mikoa na Makatibu Tawala wa mikoa yote 26 ya Tanzania bara leo jijini Dodoma kuhusu mapitio ya bajeti ya mwaka wa fedha 2021/22, Waziri Jafo amesema ukusanyaji wa mapato ya kutosha kutasaidia kuondokana na changamoto ya ufinyu wa ukomo wa bajeti (ceiling) katika mipango na bajeti za mikoa yao.

Amewataka Wakuu wa Mikoa kuhakikisha wanawahimiza watendaji wao kutumia mashine za kielektroniki katika kukusanya mapato  na wahakikishe kuwa wanakuwa wadilifu  katika kusimamia mashine hizo.

“Hakikisheni matumizi za Mashine za kieletroniki za kukusanya mapato ya Halmashuri, sambamba na kuongeza mashine zingine, lakini pia mfanye usuluhishi wa kibenki ifikapo tarehe 10 ya kila mwezi,” amesema Mhe. Jafo  

Mambo mengine aliyo yasisitiza Waziri huyo ni pamoja na usimamizi wa miradi na matumizi ya fedha za serikali ili tija iliyokusudiwa iweze kuonekana, Usimamizi wa Ugawaji wa Vitambulisho vya Wafanyabiashara Wadogo na Watoa Huduma Wadogo ambapo hadi sasa vitambulisho milioni 1.6 vimetayarishwa tayari kwa ajili kundi hilo la wafanya biashara, watakaofanya maombi kwa njia ya mtandao.

Pia amewataka viongozi hao kusimamia ukusanyaji wa kodi za majengo na ushuru wa mabango katika Mamlaka za Serikali za Mitaa, Usimamizi wa Elimumsingi bila Malipo na kuhakikisha kila mtoto mwenye umri wa kwenda shule anaandikishwa kuanza masomo.

Jafo amewataka vilevile viongozi hao, kusimamia ukarabati na ujenzi wa vituo vya Afya kwani Serikali imedhamiria kuboresha huduma za afya ili kutokomeza maradhi na pia kupunguza vifo vya akina mama wajawazito ili jamii iwe na afya njema na ishiriki kikamilifu kujenga uchumi wa nchi.

“Mnapaswa kuhakikisha kuwa, wananchi wanapata huduma za ugani za kilimo, mifugo na uvuvi kwa urahisi, lakini pia kudhibiti ubora wa pembejeo za kilimo, mifugo na uvuvi kwa kushirikiana na mamlaka za utafiti na udhibiti, ujenzi wa miundombinu ya kilimo, mifugo na uvuvi pamoja na kuboresha ushirika na masoko ya mazao ya kilimo, mifugo na uvuvi,” amesisitiza.

Agizo lingine kwa Viongozi hao ni kuwataka kufanya maandalizi ya Uwasilishaji wa Bajeti za Mikoa katika Kamati ya Kudumu ya Bunge ya Utawala na Serikali za Mitaa kwani ni takwa la Kikanuni kwa kila Mkoa kuwasilisha bajeti yake katika Kamati ya Bunge ya Utawala na Serikali za Mitaa ambayo itaanza kupitia bajeti za Mikoa tarehe 18 Machi, 2021 hadi tarehe 26 Machi, 2021, ambayo ndiyo itakuwa siku ya Majumuisho.

“Hakikisheni mnafanya maandalizi ya kutosha ikiwa ni pamoja na kuhakikisha taarifa zinazowasilishwa zinajitosheleza na pia zimezingatia maelekezo yanayotolewa mara kwa mara na Kamati,” amesisitiza.

Awali akitoa mwelekeo wa Bajeti Katibu Mkuu Ofisi ya Rais, TAMISEMI, Mhandisi Joseph Nyamhanga, amesema lengo la kikao hicho ni kujadili sura ya bajeti na mwelekeo wake, lakini pia kupokea maoni ya viongozi hao kwa ajili ya maboresho kabla yakuwasilisha hatua inayofuata kwenye kamati za Bunge.

Akishukuru kwa niaba ya Wakuu wa Mikoa na Makatibu Tawala, Mwenyekiti wa Wakuu wa Mikoa, Mhandisi, Evaristi Ndikilo ambaye pia ni Mkuu wa Mkoa wa Pwani, aliahidi kwenda kusimamia maelekezo yote yaliyotolewa, kwani shughuli wanayo ifanya ni ya wananchi na wao wamepewa dhamana ya kuwahudumia wananchi hivyo ni wajibu wao kuhakikisha wanatekeleza ipasavyo.

MWISHO