Wakurugenzi Halmashauri kupimwa kwa kigezo cha ukusanyaji wa mapato

Imewekwa tar.: September 24th, 2021

Waziri wa Nchi Ofisi ya Rais Tawala za Mikoa na Serikali za Mitaa Mhe. @ummymwalimu amesema Wakurugenzi wa Halmashauri watapimwa kwa kigezo cha ukusanyaji wa mapato ya ndani katika Halmashauri zao.

Akifungua  Mafunzo ya Wakurugenzi wa Mamlaka za Serikali za Mitaa leo jijini Dodoma  Waziri Ummy amesema  mkakati wa uliopo ni kuhakikisha Halmashauri  zinajitegemea kibajeti  na hili litawezekana tu kwa ukukusanyaji wa  mapato ya ndani  hivyo  amewaagiza kukusanya kikamilifu mapato ya ndani katika Halmashauri zao ili kufikia azma hiyo.

Akifafanua zaidi Waziri Ummy amesema katika  bajeti ya  mwaka wa fedha  2021/22  ya Mamlaka za Serikali za Mitaa ilijiwekea lengo la kukusanya kiasi cha shilingi  bilioni 863.8 hivyo kila mwezi  zinatakiwa  kukusanya   shilingi bilioni 71 na kuanzia Julai hadi Septemba ,2021 zimekusanywa shilingi Bilioni 118 badala  shilingi bilioni 142 hivyo bado ukusanyaji wa mapato upo chini.

Waziri Ummy amesema  Mamlaka za Serikali za Mitaa mpaka sasa ilitakiwa iwe imekusanya  mapato ya ndani kwa asilimia 16 lakini kuanzia julai hadi Septemba, 2021 makusanyo ni  asilimia 14, hivyo amewaagiza kusimamia ukusanyaji wa mapato ili kufikia lengo lililowekwa na Serikali.

Amewataka Wakurugenzi hao kubuni vyanzo vipya vya mapato ambavyo havileti kero kwa wala kudhalilisha wananchi  lakini  wakihakikisha wanabuni vyanzo vipya vya mapato na kusimamia kikamilifu serikali itafikia malengo yanayokusudiwa.

Aidha amewata kakuhakikisha mapato yanayokusanywa yanaingizwa benki kwa wakati ndani ya masaa 24 na kutumia mfumo wa Kielektroniki katika suala zima la ukusanyaji wa mapato.