Ustawi, Amani na Usalama wa wananchi unawategemea nyinyi – Mhe. Kiswaga

Imewekwa tar.: August 9th, 2024

Na Fred Kibano, Arusha

Mkuu wa Wilaya ya Monduli Mheshimiwa Festo Kiswagwa amewataka Maafisa Tarafa na Watendaji wa Kata mkoani Arusha kuimarisha utulivu na usalama kwenye maeneo yao kwa ustawi wa jamii isiyo na migogoro. 

Mheshimiwa Kiswaga ametoa kauli hiyo mapema leo tarehe 9 Agosti, 2024 Jijini Arusha wakati akifunga mafunzo ya kuwajengea uwezo Maafisa Tarafa na Watendaji wa Kata Mkoa wa Arusha kwa niaba ya Mkuu wa Mkoa wa Arusha Mheshimiwa Paul Makonda.

“ustawi wa wananchi katika maeneo yenu unawategemea sana nyinyi, ukweli ni kwamba shughuli nyingi za Serikali zinatekelezwa katika ngazi za chini ambako nyinyi mpo, hakuna kisichokuhusu, kaimarisheni amani, usalama na utulivu badala ya nyinyi kuwa visababishi vya wananchi kukosa imani kwenu.” alisema Mhe. Kiswaga.

Amesema kila Mtendaji wa Kata anapaswa kuvijua vijiji vyake vyote ili kuweza kusimamia ama na utulivu wa eneo lake kwani jukumu la ulinzi na usalama ni la Mtendaji wa Kata kwa zaidi ya asilimia 80 kabla halijafika ngazi yoyote lakini pia watatue migogoro yote kabla uvunjifu wa amani haujatokea huku wakiwashirikisha wananchi.

Naye Ibrahim Minja Mkurugenzi Msaidizi Idara ya Tawala za Mikoa Ofisi ya Rais TAMISEMI amesema lengo la mafunzo kwa Watendaji na Viongozi hao ni kuwajengea uwezo ili kuimarisha utendaji wao wa kazi ngazi ya msingi na awamu hii ya mwisho kutolewa mafunzo hayo inahusisha mikoa nane ya Manyara, Arusha, Mbeya na Ruvuma ambayo mfunzo yamekamilika na yataendelea katika mikoa ya Kilimanjaro, Tanga, Morogoro na Iringa ambapo Maafisa Tarafa 203 na Watendaji wa Kata 1,377 watapatiwa mafunzo ya kuwajengea uwezo.

Bi. Tatu Furahisha ni Afisa Tarafa ya Kisongo Halmashauri ya Wilaya ya Monduli mkoani Arusha amemshukuru Mhe. Rais Dkt. Samia Suluhu Hassan kutenga bajeti ya mafunzo na kwamba mafunzo hayo yatamsaidia kujiamini katika kutoa huduma bora kwa wananchi ikiwa ni pamoja na kutoa maelekezo sahihi katika ngazi ya msingi kama kubuni miradi endelevu, utatuzi wa kero na ukusanyaji wa mapato ya Serikali katika ngazi ya msingi.

Mafunzo hayo ya siku mbili yametolewa na Ofisi ya Rais TAMISEMI kupitia Programu ya Uimarishaji wa Tawala za Mikoa na Serikali za Mitaa (Regions and Local Government Strengthening Programme-RLGSP) kwa kushirikiana na Chuo cha Serikali za Mitaa Hombolo pamoja na Chuo cha Utumishi wa Umma ambapo kwa mkoa wa Arusha jumla ya washiriki 180 ambao ni Watendaji wa Kata 156 na Maafisa Tarafa 23 wamepatiwa mafunzo hayo ili kwenda kuimarisha utendaji wao wa kazi katika ngazi ya msingi.