Uongozi Jiji la Dodoma wapewa wiki moja kukamilisha kibali cha ujenzi

Imewekwa tar.: October 30th, 2018

Na Mathew Kwembe

Waziri wa Nchi Ofisi ya Rais Tawala za Mikoa na Serikali za Mitaa Mhe.Selemani Jafo amemwagiza Mkurugenzi wa Jiji la Dodoma kuhakikisha kuwa ametoa kibali cha ujenzi wa uzio wa shule ya Sekondari ya Dodoma ndani ya wiki moja kuanzia leo.

Agizo hilo amelitoa leo wakati wa Mahafali ya Kidato cha nne katika shule ya Sekondari ya Dodoma ambapo jumla ya wahitimu 223 walikabidhiwa vyeti vyao vya kumaliza kidato cha nne na Waziri wan chi.

Kwa mujibu wa maelezo ya Mkuu wa Shule ya Sekondari ya Dodoma Mwalimu Amani Mfaume, ni zaidi ya mwaka sasa uongozi wa shule hiyo umekuwa ukihangaikia kibali hicho bila mafanikio yoyote.

Kufuatia maelezo hayo, Waziri Jafo alimwagiza Mkurugenzi wa Jiji kuhakikisha kuwa ifikapo jumanne ijayo kibali hicho kiwe kimepatikana na kuahidi kuitembelea shule hiyo siku hiyo ili kujionea utekelezaji wa agizo lake hilo.

Kadhalika Waziri Jafo aliuagiza uongozi wa jiji la Dodoma kuhakikisha kuwa linaratibu zoezi la uchangiaji fedha kwa wadau mbalimbali wa jiji la Dodoma hususani wanafunzi waliowahi kusoma katika shule ya sekondari ya Dodoma ili zipatikane fedha za ujenzi wa uzio huo.

Mhe.Jafo alilitaka jiji la Dodoma kuhakikisha kuwa zoezi la ujenzi wa uzio huo uwe umekamilika ifikapo januari 2019, ili wanafunzi wanaosoma katika shule hiyo waondokane na bughudha wanayoipata sasa ambapo kutokana na kutokuwepo uzio, kumekuwa na vitendo vya kihalifu vinavyofanywa na wapita njia.

Alisema kutokana na shule hiyo ya sekondari kuwa katikati ya Jiji la Dodoma wanafunzi wa shule hiyo hasa wasichana ambao wanaishi katika mabweni yaliyopo ndani ya shule hiyo kukabiliana na changamoto mbalimbali kutoka kwa raia wasio wema waishio jijini Dodoma.

Wakati huo huo Waziri Jafo   amelitaka jiji la Dodoma kuhakikisha kuwa inaisimamia vyema shule ya sekondari ya Dodoma ili iweze kupata matokeo mazuri katika mitihani ya kidato cha nne inayotarajiwa kuanza wiki ijayo.

Alisema kuwa haiwezekani shule hiyo yenye walimu 70 kutoa wanafunzi watano tu ndiyo waliopata daraja la kwanza mwaka jana, na hivyo akaagiza uongozi wa jiji kuliangalia suala hilo kwani ni aibu kwa shule hiyo wanafunzi wake wengi kupata daraja sifuri.

Aliongeza kuwa kama alivyofanya katika wilaya ya Kisarawe kwa kuanzisha kampeni ya tokomeza ziro, anatarajia kuwa Jiji la Dodoma litafanya hivyo kwa kuanzia na shule hiyo ya Sekondari Dodoma kuhakikisha kuwa inapunguza idadi ya wanafunzi wanaopata daraja sifuri kutoka 60 na 70 ilivyo sasa kwa mwaka hadi wanafunzi chini ya watano.

Aliahidi kuwa endapo shule ya Dodoma itafaulisha zaidi ya wanafunzi 20 katika mtihani wa taifa wa kidato cha nne na wanafunzi pungufu ya watano watapata daraja sifuri, ataandaa sherehe kubwa kuwapongeza walimu na wanafunzi wa shule hiyo.