UNFPA kuboresha huduma za afya Halmashauri ya Wilaya ya Chamwino

Imewekwa tar.: May 26th, 2019

Ofisi ya Rais Tawala za Mikoa na Serikali za Mitaa kwa kushirikiana na Shirika la Umoja wa Mataifa la Idadi ya watu Duniani (UNFPA) limeongeza fedha kwa ajili ya ujenzi wa miundombinu na vifaa katika vituo vya kutolea huduma vya Halmashauri ya Wilaya ya Chamwino, Mkoani Dodoma

Hayo yamesemwa na Mratibu wa Shirika la UNFPA kutoka Ofisi ya Rais Tawala za Mikoa na Serikali za Mitaa Bi. Dinah Atinda mara baada ya kutembelea miundombinu ya vituo vya kutolea huduma kujionea hali halisi katika Halmashauri ya Wilaya ya Chamwino, Mkoani Dodoma

Bi. Atinda amesema mradi wa UNFPA umeweza kuboresha huduma ya afya ya Mama na Mtoto katika Mikoa ya Kagera, Shinyanga, Geita, Mwanza, Mtwara, Lindi na Simiyu na kuweza kupunguza idadi ya vifo vya wakinamama wajawazito na ongezeko la wananchi kuhudhuria vituo vya kutolea huduma

Amefafanua kuwa baada ya tafiti iliyofanywa katika Mikoa hiyo  iligundulika kuwa  wakinamama wengi wajawazito hawahudhurii  kiliniki na kutojifungulia katika vituo vya kutolea huduma kutokana  na ukosefu mkubwa wa miundombini bora katika vituo vya kutolea huduma jambo ambalo  linasababisha wengi kujifungulia kwa wakunga wa jadi  na kusababisha vifo.

Bi. Atinda amesema baada ya kuona mabadiliko hayo UNFPA iliona kuna umuhimu wa kuongeza vituo vya kutolea huduma katika mikoa ambayo idadi ya wanawake waliokuwa wakihudhuria Kiliniki kuwa ndogo ukiwemo Mkoa wa Dodoma.

Amesema Halmashauri ya Wilaya ya Chamwino ni miongoni mwa Halmashauri ambayo nayo inatatizo la wakina mama wajawazito  kutokuudhuria kiliniki na kujifungulia kwa wakunga wa jadi hivyo Mradi wa UNFPA kwa kushirikiana na Ofisi ya Rais Tawala za Mikoa na Serikali za Mitaa wameamua kufanya maboresho ya vituo vya kutolea huduma kwa Halmashauri hiyo ili kupunguza vifo vya Mama na Mtoto na kuboresha huduma za afya.

 “Miundombinu mibovu, kutokuwa na vifaa na vifaa tiba ni changamoto kubwa kwenye vituo vya kutolea huduma za afya za Halmashauri ya Wilaya cha Chamwino hivyo baada ya kuliona hilo shirika la UNFPA limeona umuhimu wa kujenga miundombinu ya vituo hivyo ili kuboresha huduma za afya katika Halmashauri hiyo” Amesema Bi. Atinda

Ameendelea kufafanua kuwa ili kuweza kujengewa miundombinu ya vituo vya kutolea huduma kunavigezo ambavyo vinapaswa kuangaliwa ikiwemo  umbali wa vituo vya kutolea huduma kutoka kwenye kituo cha Rufaa, uwepo wa idadi kubwa ya wananchi, idadi ya wakinamama wanaojifungulia kwenye kituo hicho cha kutolea huduma na idadi ya wakinamama wanaohudhuria kiliniki

Aidha amesema kwa Halmashauri ya Wilaya ya Chamwino itajengewa vituo vya kutolea huduma za afya vinne kwa kujengewa miundombinu, vifaa na magari ya kubebea wagonjwa.

Na.   Angela Msimbira Chamwino - DODOMA