UJENZI WA SOKO LA MWANGA NA KATONGA UTAIMARISHA MAZINGIRA YA BIASHARA KIGOMA- MHE. KATIMBA.

Imewekwa tar.: November 2nd, 2024

Naibu Waziri, Ofisi ya Rais Tawaka za Mikoa na Serikali za Mitaa TAMISEMI Mhe. Zainabu Katimba amesema ujenzi wa Soko la Kisasa la Mwanga na Soko la Samaki la Katonga mkoani Kigoma utaleta tija kubwa kwa uchumi wa mkoa huo pamoja na kukuza mazingira bora ya ufanyaji wa biashara ndani na nje ya nchi.

Mhe. Katimba ametoa kauli hiyo Novemba 02, 2024 wakati akihutubia wananchi kwenye viwanja vya Mwanga Center Kigoma Ujiji wakati wa hafla ya utiaji saini ujenzi wa soko kuu la Mwanga na Soko la samaki Katonga katika Halmashauri ya Manispaa ya Kigoma, ikiwa ni utekelezaji wa mradi wa TACTIC unaosimamia na Ofisi ya Rais - TAMISEMI.

Mhe. Katiba akimuwakilisha waziri wa TAMISEMI Mhe. Mohamed Mchengerwa amesema miradi hiyo pia inatarajiwa kupandisha pato la Halmashauri za mkoa  huo kutokana na maboresho makubwa na ujenzi wa miundombinu mbalimbali ya usafiri na usafirishaji, vizimba vya biashara, maduka pamoja na huduma nyingine za kijamii zitakazotekelezwa ndani ya kipindi cha miezi 12 ya utekelezaji wa mradi huo.

Katika hatua nyingine Mhe. Katimba amehimiza suala la uwajibikaji kwa kila anayehusika na utekelezaji wa ujenzi wa miradi hiyo akitaka ikamilike kwa wakati na kwa ubora ili tija yake ionekane mapema kwa wananchi.

Aidha pia amewataka wananchi kujitokeza kwa wingi Novemba 27, 2024 ili kuchagua Viongozi wa serikali za mitaa ili kuhakikisha kuwa wanapatikana Viongozi bora watakaoweza kusimamia ujenzi na uendeshaji wa miradi ya TACTIC inayotekelezwa kwenye Halmashauri za Miji, Majiji na Manispaa zaidi ya 40 za Tanzania bara.