Ujenzi Hospitali za Wilaya Ukamilike kwa Wakati – Mhandisi Nyamhanga

Imewekwa tar.: February 17th, 2019

Katibu Mkuu Ofisi ya Rais TAMISEMI Mhandisi Joseph Nyamhanga amewataka Watendaji wa afya katika Mikoa na Wilaya kusimamia matumizi ya fedha za Umma katika ngazi zote na kukamilisha miradi ya zahanati, hospitali za wilaya na vituo vya afya ili kuboresha huduma za afya kwa wananchi.

Mhandisi Nyamhanga ametoa kauli hiyo jana alipofanya ziara yake katika Jiji la Mwanza na Manispaa ya Ilemela na kukagua miradi ya maendeleo ambapo kwa upande wa afya alikagua ujenzi wa kituo cha afya Igoma cha Jijini Mwanza na kituo cha afya Karume na hospitali ya wilaya zote za Manispaa ya Ilemela.

“zingatieni matumizi ya fedha kwa kuwa na usimamizi makini katika ngazi zote na tumieni mashine za kielektroniki kukusanya mapato ya Serikali, jengani majengo kwa gharama nafuu yanayozingatia ubora unaotakiwa na kukamilisha ujenzi kwa wakati ili kuboresha huduma za afya kwa wananchi” alisema Mhandisi Nyamhanga

Aidha, Mhandisi Nyamhanga amesema mpaka hivi sasa katika sekta ya afya, Serikali imejenga jumla ya vituo vya afya 304 nchini kote na hospitali za wilaya 67 ambazo zinaendelea kujengwa na kila hospitali mpya ya wilaya imekwisha pelekewa kiasi cha fedha shilingi bilioni moja na nusu.

Nyamhanga ameagiza ujenzi wa hospitali mpya ya Manispaa ya Ilemela ijengwe kwa kufuata ubora na kukamilika kwa wakati ili kufikia kufikia juni, 2019 ujenzi huo uwe umekamilika kwa asilimia mia moja.

Kwa upande wake Mganga Mkuu wa Jiji la Mwanza Dkt. Juma Mfanga amesema kituo cha afya Igoma kimejengwa kwa kutumia nguvu za wananchi ambapo wamefanikiwa kujenga majengo sita ambayo ni jengo la upasuaji, jengo la wodi ya wazazi, jengo la maabara, jengo la kuhifadhia maiti, jengo la mionzi (x – ray) na jengo la kufulia nguo za wagonjwa.

Dkt. Mfanga amesema kukamilika kwa majengo ya kituo hicho licha ya kukabiliwa na changamoto ya watumishi, tayari kimepunguza msongamano wa wagonjwa katika hospitali ya wilaya ya Nyamagana, hospitali ya rufaa ya Sekou toure na hospitali ya rufaa ya kanda Bugando mkoani Mwanza.

                                                 anaandika Fred Kibano