TUTAHAKIKISHA HAKI NA HADHI YA WALIMU ZINALINDWA -DKT. MSONDE

Imewekwa tar.: March 19th, 2024

Na. Asila Twaha, Moshi

Naibu Katibu Mkuu Ofisi ya Rais -TAMISEMI anayeshughulikia Elimu Dkt. Charles Msonde ametoa wito kwa walimu kuendelea kufanya kazi na kutokukatishwa tamaa na baadhi ya watu akiwaeleza Serikali itaendelea kuhakikisha haki na hadhi ya walimu  inalindwa.

Haya ameyasema katika kikao  alicho kaa na walimu wa shule za sekondari na msingi wa Halmashauri ya Wilaya Moshi tarehe 19 Machi, 2024 katika shule ya sekonadari weru weru Mkoani Kilimanjaro.

“ninyi ni wasaidizi wa Mhe. Rais katika eneo la elimu na anawaamini sana nitoe wito fanyeni kazi kukisaidia kizazi cha Tanzania” amesema Dkt. Msonde

Dkt. Msonde amesema Serikali imeendelea kushughulikia changamoto za walimu zikiwemo  kupandishwa madaraja, kubadilishwa kwa muundo (recategorization), madai ya uhamisho,  malipo ya pesa za likizo, malimbikizo ya mshahara, na kuwashugulikia wale wote wanatoa kauli zisizoridhisha kwa watu wanaowahudumia walimu.

Amesema changamoto hizo zimeendelea  shughulikiwa na  kuhusu kupandishwa kwa madaraja maafisa utumishi wa mikoa na halmashauri walishapitia kwa kila mtumishi mwalimu  mmoja mmjoja na walimu wapatao  278,000 tayari taarifa zao zipo  ili kila mtu apate haki yake.

Aidha, amesema tayari kazi hiyo imeshafanyika chini ya usimamizi wa maafisa utumishi wa mikoa, halmashauri na Taifa na sasa kazi hiyo  ilishawasilishwa Ofisi ya Rais -Utumishi.

Dkt. Msonde ametoa wito kwa walimu kufanya   kazi kwa kuleta mabadiliko katika sekta ya elimu ya Tanzania sababu mwalimu ni mzazi na ndio mlezi na  ili kuwa maendeleo mazuri ya nchi ni lazima kuwa na kizazi kilichoelimishwa katika elimu na maadili mazuri  ya nchi yake.

Naye Mwl. Ackbaru Hema ameishukuru Serikali kwa kuendelea kuboresha mazingira ya walimu hasa yale Naibu Katibu Mkuu  Elimu aliyoyasema ambayo  ndio kilio kikubwa. Amesema wataendela kufanya kazi kwa uadilifu na kuhakikisha elimu ya watoto wa Tanzania inakuwa bora.