TIMU YA WAWEZESHAJI YANOLEWA UTARATIBU MPYA MIKOPO YA ASILIMIA 10

Imewekwa tar.: July 9th, 2024

Na Fred Kibano, Dodoma

Katibu Mkuu Ofisi ya Rais TAMISEMI Adolf Ndunguru amefungua mafunzo ya mikopo ya asilimia 10 kwa wawezeshaji wa Kitaifa na kuwataka washiriki hao kuhakikisha wanaelewa vema ili kwenda kufundisha wengine kwa viwango vinavyokubalika.

Akifungua mafunzo hayo kuhusu utoaji na usimamizi wa mikopo ya vikundi vya wanawake, vijana na watu wenye ulemavu kwa wawezeshaji wa Kitaifa mapema leo Julai, 9, 2024 jijini Dodoma, Ndunguru amewataka wawezeshaji hao kwenda kuwezesha mafunzo watakayoyapata ili malengo yake yaweze kutimia kwani Mheshimiwa Rais wa Jamhuri ya Muungano wa Tanzania, Dkt. Samia Suluhu Hassan ameagiza Mikopo irudishwe na isimamiwe kikamilifu.

“Ninafahamu kuwa uandaaji wa Kanuni, Mwongozo, vitini vya mafunzo pamoja na maboresho ya Mfumo wa Kielektroniki wa utoaji na usimamizi wa mikopo kwa vikundi umekamilika, niwapongeze wote mlioshiriki kukamilisha nyenzo zitakazowezesha utoaji wa mafunzo kwa wasimamizi na vikundi kabla ya  kuanza kutoa mikopo kama ilivyoelekezwa na Serikali,” alisema Katibu Mkuu Ndunguru.

Ndunguru amesema Serikali inatarajia kuona mafunzo hayo yanakwenda kutatua changamoto za utofauti wa uelewa na tafsiri ya baadhi ya vifungu vya kanuni kati ya Halmashauri moja na nyingine, kukosekana kwa utaratibu maalum wa utambuzi na uundaji wa vikundi vinavyotarajiwa kunufaika na mikopo ambapo ilisababisha kuwepo vikundi hewa, usimamizi usioridhisha wa mikopo inayotolewa pamoja na marejesho ambayo ilipekea kusababisha fedha nyingi za marejesho kutorejeshwa kwa wakati.

Pia amesema kukosekana kwa utaratibu mzuri wa usimamizi na ufuatiliaji wa shughuli zinazofanywa na vikundi vilivyopewa mikopo, kukosekana kwa utaratibu mzuri wa utunzaji wa kumbukumbu za mikopo, marejesho, vikundi vilivyosajiliwa na shughuli zinazofanywa na vikundi na mapungufu ya Mfumo wa Kieletroniki wa utoaji na usimamizi wa mikopo.

Naye, Mkurugenzi wa Tawala za Mikoa wa Ofisi hiyo, Beatrice Kimoleta amesema baada ya Serikali kutangaza kurejesha mikopo ya vikundi vya wanawake, vijana na watu wenye ulemavu, Ofisi ya Rais – TAMISEMI imefanya masuala mbalimbali ikihusisha marekebisho ya  Sheria ya Fedha sura 29, mapitio ya Kanuni za Mikopo ya asilimia 10, uandaaji wa Miongozo na Vitini vya mafunzo.

Pia amesema baada ya mafunzo hayo jumla ya wawezeshaji 840 watajengewa uwezo na baada ya hapo watakwenda kutoa mafunzo kwa Kamati za Uratibu wa mikopo ngazi ya Mikoa, Halmashauri na Kata kuhusu nafasi zao katika kusimamia utoaji wa mikopo ya vikundi.

Akitoa neno la shukrani Mkurugenzi wa Idara ya Teknolojia ya Habari na Mawasiliano Ofisi ya Rais – TAMISEMI, Erick Kitali amemshukuru kwa mafunzo hayo na kuahidi kusimamia maelekezo yote ya Serikali yaliyotolewa kuhusu utoaji na usimamizi wa mikopo ya vikundi vya wanawake, vijana na watu wenye ulemavu katika ngazi zote.

Mafunzo hayo ya siku tatu yamehudhuriwa na baadhi ya Wakurugenzi kutoka Ofisi ya Rais – TAMISEMI, Wawezeshaji wa Mafunzo, Wataalamu kutoka Ofisi ya Rais – TAMISEMI, Mikoa na Mamlaka za Serikali za Mitaa.