TARURA yaagizwa kujenga barabara maeneo yenye maslahi kwa jamii

Imewekwa tar.: May 30th, 2019

Wakala wa Barabara za Vijijini na Mijini (TARURA) umeagizwa kujenga barabara zao kwenye maeneo yenye fursa za kibiashara na huduma za kijamii ili kuleta tija kwa barabara hizo.

Akiongea katika kituo cha afya Simbay wakati akihitimisha ziara yake Wilayani Hanang hapo jana, katibu Mkuu Ofisi ya Rais TAMISEMI Mhandisi Joseph Nyamhanga amesema  wakala wa TARURA wanapaswa kutengeneza barabara ya kutoka Hanang mjini hadi kijijini kata ya Simbay na kuhakikisha kuwa inapitika nyakati zote za mwaka kwa lengo la kutoa huduma bora kwa wananchi waishio vijijini.

Aidha, amewataka kujenga barabara hizo kwenye maeneo yenye watu wengi na huduma za kijamii kama vile masoko na stendi ili ziwe na tija kwa wananchi lakini pia kuzingatia ubora na thamani halisi ya fedha kama ilivyokusudiwa.

Awali akiwa katika Mji wa Babati, Nyamhanga ameagiza kujengwa kwa mifereji katika barabara ya lami inayojengwa na Mradi wa kuziimarisha Serikali za Mitaa za Miji na Manispaa (ULGSP) ambayo ujenzi wake umefikia asilimia 90 na kumtaka Meneja wa TARURAkujenga mifereji ili kuongeza usalama wa wananchi na watoto na pia kuitunza kwa kusimamia isimwagiwe mafuta au kuchimba kando kando ya barabara hiyo ya lami.

Naye Kaimu Mganga Mkuu wa Wilaya ya Hanang Dkt. Boniface Manditi, awali akisoma taarifa ya ujenzi wa kituo cha Simbay amesema licha ya ubora wa kituo hicho na huduma zinazotolewa ubovu wa barabara unajitokeza wakati wa msimu wa mvua na kusababisha kukwama kwa magari yalitokuwa yakileta vifaa vya ujenzi, kubeba wagonjwa na kupeleka madawa.

Katibu Mkuu Ofisi ya Rais TAMISEMI amehitimisha ziara yake ya kikazi mkoani Manyara na kurejea Jijini Dodoma kuendelea na majumu mengine.

                                Anaandika Fred Kibano